曾幾何時，香港醫療水平喺亞洲首屈一指，成為港人嘅驕傲，可惜時移勢易，近年醫療質素每況愈下，醫療事故鑊鑊新鮮鑊鑊甘，優勢不再唔在講，連醫生夠唔夠班都成問題。
呢嗱，聯合醫院有位女醫生八個月內寫錯百幾份病理報告，引起市民嘩然，醫學界同樣震驚，連負責監管醫生專業水平嘅醫務委員會亦睇唔過眼，話無論醫生來自公營定私營機構，如果涉及嚴重過失，譬如「冇做扮有做」、「冇睇到扮有睇到」，即係醫療水準唔掂，理應接受醫委會公正審訊及懲罰。
咁又係吖，治病救人不容有失，專業水平無分公私，只要醫生犯咗嚴重過失，照計都要接受聆訊。弊在醫管局醫療事故多多，但經常大耍太極，以病人私隱為藉口，甚少將個案轉介醫委會聆訊。你話嘞，咁係咪不負責任吖？係咪草菅人命吖？
正如有醫委會成員話齋，呢次聯合醫院病理報告連番出錯，涉事醫生明顯專業失德，醫管局應該將個案交畀醫委會跟進。亦有關注團體認為，任何醫療機構如果發現醫生懷疑專業失德，都有責任主動向醫委會舉報。
開講有話，人命關天，醫管局以私隱為由，包庇專業水準不濟嘅庸醫，漠視醫療水準下降，令病人生命安全毫無保障，唔止係失德，簡直係失職。
其實，本港醫療淪落，專業水平倒退，早就唔係新聞。唔好講歐美先進國家，淨係同台灣比較已經可以見到高下喇。喺菲律賓人質事件中受槍傷嘅易小玲，喺香港歷經三十三次下顎整形手術都失敗，轉去台灣接受一次手術就成功；仲有吖，有位罹患先天性單邊肺部發育不全綜合症、得番半邊肺功能嘅女嬰，喺香港無醫生敢做手術，遠赴台灣求醫，手術成功。
所以話，唔怕唔識貨，最怕貨比貨。以前香港自命醫療系統完善，又有人才，又有設備，水準又高，依家搞成咁，究竟點解呢？答案一字咁淺，除咗港府一味諗縮數，醫療資源投入嚴重不足，加上醫管局無德無能，管理混亂，淨係識肥上瘦下，導致前線醫護人手短缺，十個煲得七個蓋，唔出事至奇。最離譜嘅係，每次爆大鑊後醫管局都避重就輕，話就話成立獨立委員會調查，其實係自己查自己，醫醫相護咯喎，又點可能解決問題吖。
正所謂，見微知著，今次聯合醫院醫療事故並非偶然，公立醫院系統百病叢生，根源就係醫管局管理混亂。計太一叮話齋，唔整頓醫管局，清理庸官，庸醫永遠都唔會消失o架，叮！
第一手消息請下載on.cc東網
