今日,本想寫無綫豬扒「沒女show」的,但看到某報老闆喺自己報紙的專欄,更惡頂!

首先,佢不斷將唔同意「袋住先」的人,封稱「激進派」。我必須申報在先,本人從來十分理性客觀去×那些庸官廢柴契弟的,更立場鮮明的超級反對虛偽假普選,尤其不會受人老點而隨便贊成「袋住先」的,但係,本人絕非「激進派」。

呢位仁兄以佢有份科水做的民調作準,話「即使提名程序不滿意,二○一七年都可以先實行一人一票選行政長官」,即「袋住先」也!佢又話「民主發展的程度上,香港已不亞於英美兩國。香港是直選,他們仍是間選。美國總統由選舉人選出,非直接由選民選出。」更說「現實是世上的民主制度,至今仍未完備至可以真的讓人民當家作主……不管有沒有事前的篩選,只要有兩個以上的候選人,香港人就有機會行使否決權……」云云。

佢仲有好多似是而非的廢話,不能盡錄,淨係上述幾句已見他刻意偷換概念,幫「幫港出聲」而發聲。

若呢位仁兄沒有失憶的話,北大人曾話過二○○七年及二○一二都會給港人自選特首的,家吓點呢?劑劑在搬龍門呀!氹人剝咗條褲先唔認帳呀!仲「袋住先」?仲要受人愚弄?哼!話香港有「直選」?美國之選舉人制度,因人家除了地方大,還是聯邦制呀!香港咁細,最有「一人一票」選特首的條件,何須有間選?好比一座大廈立案法團選主席,仲要分逐層篩選代表出戰?白唔白癡啲呀?

只要有得選,假嘅都玩住先?人哋畀兩舊屎你揀一舊食,你都揀嚟「食住先」?咪咁反智啦!本來原先係我哋應有嘅權利,做乜畀人哋搶走後,仲要扮乖乖豬等人施捨番畀你呢?

呢位仁兄,寫番你拿手的無為而治罷啦!政治係畀粉腸奴才玩的!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps