旅業貢獻被低估 魚與熊掌可兼得
今時今日，中港矛盾已經成為解唔開嘅死結，搞到港府進退失據，話要檢討個人遊政策，但又遲遲冇結果。其實，檢討個人遊講就容易，做就一啲都唔易，事關牽一髮動全身，隨時損失數以百億計經濟收益，打爛無數打工仔飯碗，當局點敢亂來吖。
口講無憑，睇數字最實際。零售業界委託獨立經濟學者分析過去十年嘅經濟數據，發現政府過分低估旅遊業對本港嘅貢獻。統計處一直話旅遊業只佔本地生產總值百分之四點七，但冇考慮到物流、批發、存倉、廣告、金融、保險等相關行業，加加埋埋，旅遊業起碼佔本地生產總值一成半至真。報告仲話，過去十年本地市場消費開支增加八千二百億元，比本港GDP增加八千億元仲要多，其中旅客喺本地市場消費開支增長二千三百二十億元，證明旅客帶旺消費市場之餘，港人賺取額外收入後亦再帶動消費，係win win雙贏咁話。
所以話，一榮俱榮，一損俱損，個人遊唔止關乎旅遊業，仲影響各行各業添。正如有學者話齋，目前有過百萬基層市民從事由旅遊業衍生嘅相關行業，佢哋學歷唔高，又冇一技之長，萬一失業，可能連生計都成問題。仲有呀，最近內地強力反腐，加上內地旅客消費模式改變，零售業總銷貨值已經連續多月錄得跌幅，四月份按年下跌近一成，五月份亦下跌百分之四，奢侈品銷售更大跌兩三成之多。零售業已經吹起寒風，如果仲要削減個人遊，豈不是雪上加霜？
無可否認，香港係彈丸之地，承受能力有限，而且因為文化背景及生活習慣差異，內地旅客嘅所作所為的確令唔少香港人討厭，加上水貨活動滋擾，部分市民希望減少內地旅客數量，絕對可以理解。之但係，理想係一回事，現實係另一回事，減少內地旅客之後，香港係咪就天下太平呢？係咪就一了百了呢？只怕到時經濟受損，打工仔生計冇着落，呢個後果邊個承擔得起？
歸根究柢，中港矛盾之所以愈演愈烈，激進團體之所以又「驅蝗」又「拖篋」，港府實在難辭其咎。旅客愈來愈多，搞到兩地居民衝突不斷，港府幾時有諗辦法疏導及化解吖？社會各界三番四次要求港府盡快落實喺邊境等地方增設購物城，開發更多旅遊設施，提升接待能力，港府咪又係聽完就算。
計太一叮話齋，魚與熊掌，未必不可兼得，關鍵係港府有冇承擔，有冇決心嘅啫。港府檢討個人遊之所以騎虎難下，進退失據，根本係自己無能所造成，唔怪得其他人o架，叮！
