海洋奇觀魚猶死 今日香江人何堪
怪事處處有，香港特別多。好似海洋公園咁吖，宗旨之一明明係保育動物，點知竟然一再成為動物殺手。唔通歌仔唱嘅「去玩，去癲，嚟ocean park」，唔係講遊客，而係講緊被玩到殘、逼到死嘅動物。
冇錯嘞，太一叮講嘅係海洋公園「海洋奇觀」裏面兩個小型魚缸，本月初發現有五十九條魚集體死亡，其中包括幼年狗侶竹鯊等瀕危物種。
聽吓園方點解畫，佢哋話喎，魚類集體死亡前一日，因為要進行池水處理項目而關閉造浪功能，之後唔記得開番，缸內已過濾嘅含氧池水唔夠，搞到啲魚窒息而死。嘩，一個大型主題公園嘅水族館，竟然好似牛頭角順嫂咁，犯唔記得換水搞到啲金魚死晒嘅低級人為錯誤，乜嘢集體死亡吖，集體屠殺至真。
講開又講，香港家陣係多事之秋，海洋公園都係頭頭碰着黑，負面新聞接二連三，除咗養死魚外，有前員工指控園方用體罰方法訓練表演嘅動物，都咪話唔邪門。
講番魚類集體死亡呢單嘢。其實從風水學角度出發，「山主人丁，水主財」，咁魚兒離不開水咯喎，自然吸引唔少人養嚟開財運。大家諗吓，今次一鑊過死咁多魚，好多仲係珍貴品種添，認真大吉利是。嗱，唔係嚇大家o架，○八年北大人送咗五條珍貴中華鱘畀海洋公園，作為香港回歸周年紀念，點知出師未捷身先死，其中一條中華鱘畀其他魚咬死，多條病死，結果同一年爆出雷曼兄弟事件，引發全球金融海嘯，唔少投資者損手爛腳，本港國際金融中心招牌被打殘，真係杰一杰都冇咁杰。
當然啦，風水玄學呢家嘢，見仁見智，信不信由你，但如果話今時今日市民嘅處境，唔好得缺氧嘅魚幾多，相信冇人會反對。唔係咩，港府施政混亂不堪，民生經濟冇瓣掂，衣食住行樣樣難，市民早已叫苦連天。部分政客渾水摸魚，為反對而反對，為爭拗而爭拗，正經嘢冇人關心都算啦，最慘係社會分化對立日益嚴重，凡事不問是非，只問立場，郁吓就要歸邊、站隊，喺一股低氣壓之下，沉默嘅大多數想抖啖氣都難，惟有嘆句「魚猶如此，人何以堪」。
古人相信天人感應，漢代董仲舒係咁解釋嘅︰「國家將有失道之敗，而天乃先出災害以譴告之，不知自省，又出怪異以警懼之，尚不知變，而傷敗乃至。」照咁講，海洋公園魚兒集體死亡係不祥之兆，為政者再唔深刻檢討，改弦更張，遲早有更大鑊嘢發生o架，叮！
