主辦世盃得個吉？巴西、俄羅斯「燒錢」養肥國際足協（FIFA）！FIFA今屆世盃勁袋20億美元（約155億港元），可憐東道主巴西就蝕9億美元（約69億港元）離場，冇錢又冇面！接棒主辦史上最貴世盃嘅俄羅斯，已經着手喺20個城市搞緊訓練基地，但12個世盃球場嘅翻新同興建工程唔淨止嚴重延誤，仲大幅超支41億美元（約317億港元）！

巴西總理羅塞夫（左）同下屆世盃主辦國俄羅斯總統普京（右）進行簡單交棒儀式。（法新社圖片）

亞馬遜球場得物無所用

FIFA官方表示，透過出售世盃轉播權同贊助商收入，今屆世盃大約有40億美元收入，扣除為今屆賽事投放20億美元，今次巴西世盃都淨袋20億美元。反觀巴西政府豪燒149億美元籌辦世盃，預算收入係140億美元，蝕足成9億美元。兼且位於馬惱斯嘅亞馬遜球場，當地根本冇正式足球隊，世盃後真係「得物無所用」，嚟緊大把問題要面對。

隨住巴西世盃曲終人散，昨晨出席決賽並完成主辦權交接儀式嘅俄羅斯總統普京，將會面臨唔少大難題。俄羅斯體育部長兼世盃組委會發言人穆特科話，已經着手喺20個城市為2018世盃決賽周列強搞緊訓練基地，但佢亦自爆12個世盃球場當中嘅10個新建球場入面，有7個仲係設計階段，工程嚴重延誤。最大劑係原定28億美元嘅興建及翻新球場預算，家陣已經超支超過1倍，達到69億美元！

本身俄羅斯預計投放210億美元打造世盃，已經係歷屆最盡，家下咁多阻滯，到時隨時唔止呢個數。運動經濟學家Andrew Zimbalist日前已經發出警告謂「索契冬奧係俄國經濟災難」，2018世盃極可能步索契冬奧後塵都似。

俄足總副會長撐卡比路

至於下屆世盃主角俄羅斯國家隊，喺巴西世盃分組賽出局之後，領隊卡比路畀人插到暈，俄羅斯足總副會長施蒙恩就開腔力撐呢位主帥，仲話冇教波經驗嘅人冇資格批評卡比路，強調自己同足總都會全力支持佢。

2018世盃資料

主辦國：俄羅斯

日期：2018年6月8日至7月8日

主辦城市及球場數目：4大賽區、11個城市/12個球場