北上發展阻滯多 水土不服嘆奈何
俗語有云，一方水土養一方人。即係話，如果水土不服，做乜都唔掂。呢嗱，香港深圳雖然只係一河之隔，但兩地文化差天共地，港人北上發展，想企穩陣腳，一啲都唔易o架。
話說香港大學同深圳市政府合作開設港大深圳醫院，本來諗住將香港醫院嘅管理模式引進內地，作為內地醫療改革嘅試點，亦為內地病人提供多一個選擇，點知水土不服，開業未夠兩年，由於持續虧蝕，以致出現財政危機，連港大墊支嘅兩億港元都收唔番。唔怪得有人擔心醫院可能變成無底洞，填極都唔滿。
唔係杞人憂天o架，當初港大同深圳當局簽署合作備忘錄時，深圳方面承諾全力支持，除咗撥出地皮，仲話會負責首五年嘅經營開支，點知原來得個講字。對於港大墊支嘅兩億元點樣解決，深圳方面話要等到醫院收支平衡至還錢喎。其實，根據顧問報告，如果按目前模式營運，醫院可能永遠都冇辦法做到收支平衡，換句話講，港大墊支嘅兩億元直頭凍過水喇。
咁都未算吖，顧問報告指出，醫院至今已虧蝕十億元，如果情況冇改善，未來十年累積虧蝕可能達到四十八億元添。港大呢次真係洗濕個頭咯，做又唔係，唔做又唔係，正一進退兩難。校務委員會尋日召開特別會議討論相關事宜，話就話繼續支持醫院發展，仲提出唔少加強服務嘅建議，不過咁，如果財務狀況得唔到改善，究竟可以捱到幾時，真係令人懷疑。
話時話，隨着兩地不斷融合，北上拓展已成為潮流，連高等學府亦唔執輸。可惜由於兩地法律及文化唔同，以致問題百出，糾紛多多。呢，本報曾報道過，雖然港大深圳醫院將本港公立醫院管理模式引入內地，嚴禁醫生收紅包同「以藥補醫」，但由於運作模式同內地唔同，結果遇到唔少阻滯，除咗人手緊張、購置儀器唔順利之外，仲要面對無日無之嘅「醫閙」，甚至有病人因為不滿手術後出現輕微併發症，居然恐嚇醫生：「我係公安，揸槍返工嘅。」問你怕未！
今時今日，兩地合作成為趨勢，除咗北上拓展醫療服務，亦有多間學府北上辦學同搞科研等，連安老服務都話要北望神州。即係咁，人望高處，水向低流，呢啲本來好正常嘅，香港發展空間始終有限，向內地發展係大勢所趨，問題係，兩地法律制度、管治文化同辦事作風都唔同，如果北上之前冇做足功課，隨時撞板多過食飯。嗱，港大深圳醫院進退兩難咪就係前車之鑑囉，大家最好三思而後行吖！
