C朗勢危轉攻美國市場！靚仔又好波嘅占士洛迪古斯「登艦」後旋即成為皇馬新寵，加埋西媒大爆「大聖爺」加里夫巴利來季地位會比C朗更高，搞到呢位葡萄牙萬人迷隨時冇碇企。不過C朗勝在人面夠廣，自然大把後路，近日美國「Rap王」Lil Wayne開設全新體育市場公司，「首簽」正係着力開拓美國市場嘅C朗！Lil Wayne將會「包起」呢位老友喺美國所有廣告同模特兒合約齊齊掘金，做慣自家品牌CR7 Model嘅C朗嚟緊隨時行天橋多過食飯！

皇馬一向球星如雲，今夏再斥資買入卻奧斯同人氣爆燈嘅「J神」占士洛迪古斯，加埋原有嘅C朗、加里夫巴利、賓施馬、迪馬利亞等，星味唔輸得過以前「7條A」幾多。主帥「肥安」安察洛堤繼日前大讚「J神」屬皇馬嘅未來後，尋日西班牙《機密報》又以頭條大爆，喺「肥安」嘅心目中，加里夫巴利喺新球季嘅重要性排「銀河艦隊」No.1，就連做開大佬嘅C朗都要企歪，甚至有傳皇馬考慮賣走呢位近期備受傷患困擾嘅萬人迷添。

咁都未算慘，C朗早前喺facebook大搞Gimmick，出咗個Post話如果有超過50萬人讚好，就會率先公開原定下周發布嘅最新底褲宣傳照，實行用「肉照」呃Like。點知個Post出咗兩日，夾夾埋埋得22萬個讚好，借啲意宣傳嘅如意算盤打唔響，唔通C朗連「賣肉」呢招都失埋效？

簽「Rap王」老友經理人公司 訪日擺甫士遙距致敬

雖然喺皇馬嘅一哥地位受到衝擊，不過C朗嘅影響力依然唔講得笑！著名美國「Rap王」Lil Wayne新成立嘅體育經理人公司，啱啱完成首項「收購」，就係簽入C朗呢位應屆世界足球先生，幫佢開拓美國市場！Lil Wayne話明只係負責C朗喺「花旗國」範圍內嘅廣告及代言合約事宜，消息仲話C朗睇中足球喺美國愈嚟愈受歡迎，所以希望同Lil Wayne藉此搵番筆添！

Lil Wayne咁關照，C朗當然識做啦，呢位葡國天王早前訪日期間，拉埋當地首相府官員做出由Lil Wayne發起、向佢所屬唱片公司（YMCMB）致敬嘅同名甫士「YMCMB（Young Money Cash Money Billionaires）」，實行遙距向「新老闆」致敬。