今年雙春兼閏月，好多人都辦喜事，啱啱又八到恒發洋參老闆「洋參大王」楊永仁將會喺今年年底嫁女啦！咪就係之前上市時，捧場嗰位靚女千金Karen囉，真係恭喜晒！楊生今年成功將恒發洋參上市，嚟緊仲嫁女，真係雙喜臨門喇！

楊永仁今年成功將恒發上市，年底又嫁女，可謂雙喜臨門。（資料圖片）

仲記得喺恒發洋參上市嗰時，無論係記者會定係投資者推介會，Karen都有出席撐老竇場，之不過到上市當日，就竟然無去到上市儀式，真係令人有啲摸不着頭腦，但聽講原來嗰陣時佢就係去咗影結婚相呀，仲遠赴西班牙影添！唔知有冇喺鬥牛場取景呢？據聞仲會喺今年年底就拉埋天窗，究竟邊個咁有福氣，娶到二十六歲嘅Karen呢？

聽講Karen會喺君悅擺酒，唔知到時楊生會唔會指定用番恒發啲參茸海味，話晒私伙嘢梗係夠晒足料，楊生又咁講究，分分鐘拎埋鎮店之寶大宴親朋，第一次嫁女，咁大件喜事喎，賓客有福喇！

第一手消息請下載on.cc東網iPhone/iPad/Android/Windows Phone Apps