SUN揭秘：去年失業積蓄養五口家
今年三十九歲的Gary，外形結實，一身黝黑膚色，踩着單車時，猶像一名大細路，但原來他已是三個小朋友的父親，「舊年細女出世嗰時，間印刷廠突然執笠。我喺嗰度打咗十幾年工，霎時間無咗份工，真係好徬徨。」失業至今，他只靠積蓄，勉強養活一家五口，「好在自己都算勤力，前老闆對我幾好，平時慳住用都儲到啲錢。」
難負擔700元倉租
在印刷工之前，他做過地盤、小販、售貨員，甚至試過創業，「最好賺係賣『朱義盛』，不過後嚟開舖賣樹脂模型，喺香港就唔係好受歡迎，做咗年幾，最後都係蝕錢。」不過，積蓄總會耗盡，就連本月用作存放單車的迷你倉七百多元月租，Gary仍未繳交。為了生計，他現正積極搵工，「之前見咗兩份跟車，仲等緊消息，遲啲就去上堂拎張平安卡傍身。」
