但凡建制派政黨或社團搞撐政府活動,為咗湊人數都會用盡辦法氹人去參加。人民力量立法會議員「慢必」陳志全話,佢有朋友參加工聯會搞嘅興趣班,近日都收到短訊叫人到時去工聯會旗幟附近集會。

講講吓,慢必都差啲有機會收到呢類訊息,事關二十年前佢曾經去工聯會業餘進修中心學泰文,當時都有人游說佢做會員,話報讀課程會平啲,但佢就冇貪小便宜入會,同工聯會可算係緣慳一面。

講開泰文,慢必話自己當年係「泰國通」,識講又識寫泰文,又成日去曼谷等地,之但係過咗咁多年,乜都還番晒畀老師囉!呢排好多議員趁暑假去旅行,佢都唔執輸,日前出發外遊到星期日先返,幾日後又再飛去德國一個星期出席佛教論壇,期間有機會同西藏流亡精神領袖達賴喇嘛會面。身為佛教徒嘅慢必話,今次見達賴純粹係宗教活動,到時應該唔會講政治議題喇!

第一手消息請下載on.cc東網iPhone/iPad/Android/Windows Phone Apps