同人唔同命,同遮唔同柄,打政府工唔等於揸「鐵飯碗」,做同樣嘅嘢,待遇可能差天共地,報酬低一大橛不特止,連基本保障亦欠奉,講起實在可悲。

唔講唔知,原來港府聘請嘅非公務員合約僱員已達到一萬一千幾人,本年度請得最多嘅部門依次係教育局、康文署同衞生署。本來呢,人多好辦事,請多咗人做嘢,服務質素應該有所改善至係,弊在同工唔同酬,合約僱員唔係公務員,普遍以低於同等職級公務員嘅待遇獲聘,有啲部門薪酬相差甚至達到兩成或以上,部分人長年累月喺呢種唔公平嘅待遇下工作,搞到士氣不振,點可能改善服務質素吖。

最離譜嘅係,有啲員工做咗十幾年,仍然係合約僱員,部分員工嘅遣散費或長期服務金要同強積金對沖,毫無保障。有立法會議員話齋,呢啲員工已經淪為無晉升、無福利、無加薪、無保障、無前途嘅「五無」,促請港府做良心僱主,增加公務員職位同帶頭取消強積金對沖。

點解會有合約僱員?咁就要講那些年咯。話說九七年亞洲金融風暴後,港府陷入財赤,公務員團隊因過於臃腫而備受批評,政黨紛紛要求政府「瘦身減磅」。於是乎,當局九九年開始聘用合約僱員,話就話可以減少公務員人數,同時維持公共服務,點知弄巧反拙,合約僱員愈請愈多,問題亦愈來愈多。

港府當時話,聘請合約僱員係應付有「時限」或「季節性」嘅需求喎。其實,唔少合約僱員已經捱咗十幾年,所謂「時限」及「季節性」根本係欺人之談。近年社會上唔少聲音要求港府將年資較長而且工種有長期需求嘅合約僱員轉為全職公務員,可惜當局好似借咗聾耳陳對耳咁,一於懶理,乜都唔做。

好多合約僱員默默耕耘,一直得唔到公平待遇,港府關人個關,但對「自己友」就百般呵護,關照唯恐不及。近年政府部門多次爆出翻閹高官嘅醜聞,退休高級公務員揸住金飯碗唔滿足,仲要捧埋「鑽石飯碗」,享受雙重福利,難為嗰啲合約僱員捱到金睛火眼,莫講話鐵飯碗,連泥飯碗都隨時不保,你話港府係咪無良僱主吖?

人比人比死人,待遇不公必然會影響合約僱員嘅士氣,導致服務質素下降,最終受害嘅係全港市民,呢條數當局有冇計過?

計太一叮話齋,如果港府真係想改變「無良僱主」嘅惡名,就唔好再諗縮數,應該一視同仁,善待所有合約員工,如果唔係,盞搞到怨聲載道,禍起蕭牆嘅咋,叮!

第一手消息請下載on.cc東網iPhone/iPad/Android/Windows Phone Apps