【本報記者方傑上海直擊】唔貪錢、教防守，高比拜仁（Kobe Bryant）轉死性？「小飛俠」從不考慮減薪幫球隊重建，打波風格亦出名獨食，偏偏這位湖人球星於上海行卻一反常態，罕有教一眾籃球小將打防守，又表示退役後無意在NBA執教鞭，寧願教小朋友打波好過，認真「估佢唔到」！

呢位幸運女助教被碧克選為每日最佳球員，獲得高比簽名波衫同擁抱一個。

高比拜仁訪問中大談防守重要性。

小飛俠逐一指導學員防守技巧。

高比拜仁昨日繼續主持 「打出名堂 Rise 之旅」第2階段選拔，於上海江灣體育館落場指導後輩，並接受傳媒訪問。不少球員都打而優則教，被問到退役後會否成為NBA教練，高比馬上耍手擰頭：「做教練冇問題，但一定唔會教NBA球隊，我寧願周圍教小朋友打波好過！」打法出名獨食、 「唔交波」的高比，更於訪問時罕有大談防守經：「新季湖人首要條件係改善防守，防守籃板同緊迫性防守做得好唔好係成功關鍵。」

執靚參賽者防守動作

坦言享受朝朝4點鐘起床練波的高比，新季將全面復出，對於林書豪（Jeremy Lin）及布沙（Carlos Boozer）的加盟， 「小飛俠」表示期待與新隊友合作。可能仍未適應時差，昨日高比於早上11時登場時明顯睡眼惺忪，但 「小飛俠」很快就 「撻着」，不單止落手落腳執靚30位Rise Challenge參賽者的背籃功及防守動作，對於一班後輩的籃球疑問，高比更加有問必答，並公開其步法要訣，參賽者肯定獲益良多。

經過大約個半鐘的指導後，高比謂對亞洲新一代球員另眼相看：「其實亞洲球員水平近年已經同國際球員拉近好多，對抗性明顯增強，但技術仲有進步空間。」高比會於上海出席多3課Rise Challenge訓練營，並揀選10位幸運兒進入第3階段選拔。