政壇：立會大樓漏水正豆腐渣工程

添馬艦新立法會大樓自落成以來，一直畀人話係「豆腐渣」工程，因為每逢大雨都會滲水入大樓，又試過因為消防灑水系統開啟，搞到消防用水漏足幾層樓，立會秘書處職員於是趁抖暑期間做執漏工程，但尋日連場紅、黃雨又再導致滲水。

工程人員正在架起圍板及高台維修天花。

我哋尋日行經立法會議員入口，見到工程人員封起一邊門，同時架起圍板同高台，幾名工人維修緊假天花，隔籬嘅假天花仲有啲水漬添，相信係尋日大雨造成滲漏。職員透露，執漏工程會分期進行，之後就改封另一邊門維修假天花。