家陣嘅香港,日日為咗政治爭拗家嘈屋閉,世界大事無人關心。不過唔關心唔等於唔存在,呢,伊波拉病毒來勢洶洶,肆虐非洲,已奪去六百幾條人命,連美國衞生當局都話病毒正以星火燎原之勢蔓延。港府防疫稍有鬆懈,隨時中招嘅咋!

嗱嗱嗱,好嘅唔靈醜嘅靈,話口未完,尋日本港就發生伊波拉疑雲嘞。話說一名剛從非洲肯尼亞回港嘅女子,因為嘔吐發燒,電召白車送院,救護員不敢掉以輕心,由頭包到落腳全副「武裝」上陣,女事主最終要接受隔離治療。雖然今次好可能只係虛驚一場,但伊波拉病毒唔係講玩,小心駛得萬年船,防疫梗係寧緊勿鬆啦。

多年前有套荷里活電影《極度驚慌》,講嘅正正係伊波拉病毒,如果大家有睇過,一定記憶猶新。伊波拉最恐怖之處,係死亡率極高,達到九成,唔止可以人傳人,更可人畜接觸感染,病人除咗發燒嘔吐,仲會體內及體外出血,而且目前係無藥可醫,亦無疫苗,由發病到死亡只需七至十四日。好似今次肆虐大半個非洲嘅伊波拉病毒咁,目前死亡率已逾六成,甚至連在當地參與救治的美國醫生都不幸中招,你話唔驚就假嘞。

家陣係地球村年代,香港又係國際大都市,交通網絡四通八達,非洲看似遙不可及,其實彈指即到,千祈咪以為伊波拉病毒唔關香港事。嗱,唔係靠嚇呀,香港每年有唔少非洲難民申請酷刑聲請湧港,只要有一個人帶住病毒入境,後果已經不堪設想。仲有呀,同香港鄰近嘅廣州,近年有多達二十餘萬非洲人聚居,萬一病毒喺廣州爆發,香港一樣殃及池魚嘅咋,沙士瘟疫由廣州傳入就係前車之鑑喇。

唉,近年香港唔知交上乜嘢惡運,疫情一浪接一浪,當年禽流感喺香港率先爆發,死咗唔少人,其後沙士南下又奪去二百九十九條人命,接住又有豬流感、變種禽流感輪番登場,次次搞到雞毛鴨血。講到底,病毒之所以長驅直進,如入無人之境,根本係衞生當局漫不經心、把關不力所致。好似今次伊波拉病毒咁,食物及衞生局高官話就話高度關注,但所謂嘅防疫措施,不過係提醒市民如無必要唔好去西非國家,同埋提醒醫生及旅遊業界提高警惕咁大把,講咗等於冇講,你話咁樣同自求多福、望天打卦有乜分別吖!

家陣香港正值多事之秋,社會愈來愈政治化,愈來愈撕裂,港府施政陷入癱瘓。成個社會一味窩裏鬥,致命病毒隨時殺到埋身都唔知,咁就大鑊嘞,叮!

第一手消息請下載on.cc東網iPhone/iPad/Android/Windows Phone Apps