開講有話：有東方，冇窮人。不過家陣要加多句：上東網，知天下。梗係啦，東方報業集團旗艦網站「on.cc東網」精益求精，力臻完美，家陣又有新搞作嘞，重頭戲係「ontv東網電視」大革新，唔止優化版面，仲花開兩朵，推出港澳台同台灣台，國粵語節目任君選擇，包保觀眾「東網在手，天下我有」！

唔係賣花讚花香，東網電視不嬲敢為天下先，今次再創網絡電視先河嘞。嗱，台灣台尋日打響頭炮嘅《濁閱天下》，由民進黨重量級人物林濁水親自出馬，講解台灣市長選舉藍綠之爭，由政治人物出身到選戰布局，針針見血，句句到肉，一推出即轟動網絡，連當地年輕警官都拍爛手掌，點到你唔服吖！

台灣台一鳴驚人，港澳台一樣精彩。呢，係人都知名嘴黃毓民見解獨到，入木三分，由佢主持嘅《毓民踢爆》保證聽出耳油；軍事專家馬鼎盛主持嘅《軍政鼎盛》亦不遑多讓，由佢分析世界大事，睇通睇透，家陣仲會加推國語版添。至於娛樂節目咯喎，簡直美女如雲，目不暇給，既有《東網Baby》訪問火辣辣嘅娛樂圈女神，又有台灣五人女子團體Popu Lady逢周五主持《東網Pop U秀》玩盡台灣，你話唔睇點得吖！

講到呢度，係咪好想即刻上東網電視一飽眼福呢？無錯嘞，為咗令觀眾睇得更加開心，東網電視Web版面推陳出新，Menu Bar置於網頁頂部，內容分門別類，一目了然，既方便又快捷。咁仲唔止，網頁仲有短片搜尋功能，只要輸入搜索字眼，即可搵到心水影片。仲有呀，Web版功能再提升，只要向下捲動搜尋更多影片時，播放器就會自動縮小置於網頁左上角，觀眾一邊觀看影片又得，一邊搜尋其他影片亦得，得咗！

手機App當然亦唔執輸啦，一樣可以收睇港澳台同台灣台。辦法好簡單，只要將手機App更新，然後點選左上角「on.cc東網」標誌，拉出隱藏嘅Menu Bar，就可以隨時隨地欣賞精彩內容喇。所以話，「上東網，知天下」，真係一啲都冇誇張。只要一機在手，就可以知盡香港事、台灣事、內地事、世界事，你話係咪盞先？而且仲係免費喎，簡直盞上加盞喇！咁筍嘅嘢，係東網電視先有嘅咋！

一句到尾，東網推陳出新，你想得出，我做得到，內容精彩，版面新穎，時事、娛樂、財經、體育、生活包羅萬有，正所謂快人一步，理想達到，咁大家仲等咩呀，梗係行動最實際，即刻上東網電視先睹為快啦！

第一手消息請下載on.cc東網iPhone/iPad/Android/Windows Phone Apps