相隔六年，張建宗個樣冇乜點變，只係多咗副眼鏡。
趁住立法會依家放暑假，好多議員都外遊充電，有個別問責官員亦都乘機外遊抖抖，而留守喺香港嘅官員雖然唔使去立法會受靶，但都冇時停噃！
好似勞工及福利局局長張建宗咁，佢就趁住呢段時間不時去視察吓轄下機構嘅運作情況，尋日就去咗勞工處設喺葵芳新都會廣場嘅「青年就業起點」（Y.E.S）中心，聽取勞工處職員同負責營運呢個中心嘅香港基督教女青年會職員簡介中心嘅日常運作，同埋各項服務範疇嘅概況。
喺視察期間，有職員仲攞咗張相畀張建宗睇添！有乜咁特別？原來呢張相就係佢喺六年前中心開幕時影嘅。相隔六年再舊地重遊，唔知佢有乜感想呢？但睇番張舊相，就覺得個樣冇乜走樣，髮型一樣，頭髮都係咁少，亦唔覺得又少咗，唯獨係多咗副眼鏡啫！
第一手消息請下載on.cc東網
