政壇：滙控發花紅 安思明贏王冬勝
滙控薪酬新制度落實，十五個高層合共袋咗超過七百萬英鎊股份作花紅。根據滙控公布資料，幫公司搵錢最多嘅始終都係炒樓，即係環球銀行及資本市場業務（GBM）部門行政總裁安思明，其次先係行政總裁歐智華，至於主席范智廉就無份。
王冬勝
安思明
仲記得滙控今年開始引入固定薪金津貼，即係每季用股票形式支付畀管理層，補貼番歐盟花紅限制嘅影響，獲派股份嘅管理層要扣咗稅先，至下年三月可以先袋兩成股票獎勵，但要到二○二○年先可以袋埋剩低嗰八成。
至於獲發花紅最多三人中，安思明獲發一百五十萬英鎊滙控股份最勁，歐智華緊隨其後，獲發八十四萬八千英鎊股份，排第三已經到亞太區行政總裁王冬勝，獲派約七十六萬英鎊股份，話晒負責亞太區嘅滙豐核心盈利年年創新高，論跑數戰績都算合理。
