工潮沒完沒了 泳客慘成磨心

嗱，話口未完，救生員今日又罷工嘞。港九拯溺員工會係咁講嘅，因為康文署長期漠視救生員人手不足，加上內地泳客大增，搞到救生員工作壓力爆煲。為咗迫使署方正視問題，盡早設立救生員職系，改善待遇，增加人手，無奈決定罷工。工會仲話，目前已有逾百名救生員響應，有六、七個泳池及泳灘受影響，希望市民諒解咁話。

係人都知，康文署多年前以經濟衰退為由，大幅減少救生員人手，近年雖有所增加，但據講人手仍然不足，目前每個標準池只得三人當值，唔符合至少四人嘅國際標準。更離譜嘅係，康文署為咗諗縮數，甚至以冇拯溺資格嘅保安員巡邏池面，「分擔」正牌救生員嘅工作，分分鐘危及泳客安全。

救生員工會講得冠冕堂皇，但康文署就有另一套講法，誰是誰非，公眾一時好難搞清楚。之但係，救生員罷工近年已成常態，郁吓就集體請病假，郁吓就野貓式罷工，每次都搞到泳客乘興而來，敗興而返，本來同情救生員嘅市民都好難同情落去咯。呢，好似上個月之嘛，元朗游泳池突然貼出通告，話因為救生員當值人數不足而要關池喎，泳客唔嬲就假。仲有呀，今年四月，維多利亞公園泳池嘅救生員因為集體「生病」，搞到無法開池，慘食閉門羹嘅泳客仲火滾到同保安員大打出手添。

講番今次罷工，規模係近年最大，受影響嘅泳池及泳灘眾多，加上暑假係游泳旺季，工潮好難得到市民支持之餘，隨時弄巧成拙都有之。學巴士阿叔話齋，你有壓力，我有壓力，打工仔邊個冇壓力吖，如果個個都以自己利益為先，公院醫生、救護員、消防員、警察一唔滿意就罷工，咁香港仲成世界嘅！

當然啦，千錯萬錯，最錯肯定係康文署。救生員要求增加人手並非完全冇道理，但署方一直愛理不理，好似今次咁，康文署根本冇好好同工會傾過，只係話會盡量抽調其他人手應急，人手唔夠惟有關閉泳池，泳灘就掛紅旗提醒泳客唔好落水喎，咁同斬腳趾避沙蟲有乜分別吖。

點講都好，泳池及泳灘係公眾設施，公眾利益慘被「騎劫」，只會惹人反感嘅咋。唔該康文署快啲同救生員四四六六拆掂佢，唔啱講到啱，千祈咪攞泳客安全嚟較飛呀，叮！