議事堂近排真係撞邪，議員收受淫賤黎黑金醜聞愈描愈黑，而開支報銷又係一盤爛數，可謂一醜未平一醜來。政客其身不正，寬己嚴人，唔怪得香港烏煙瘴氣，亂過亂世佳人嘞。
好多人可能唔知，立法會議員除咗每月八萬幾元薪酬外，仲可以報銷交通、應酬包括紅白二事等開支，每年可達十九萬多元，平均每月萬幾元，條數唔少o架。本來呢，議員論政議政，津貼部分開支都無可厚非嘅，弊在報銷制度甩甩漏漏，話就話實報實銷，其實既唔使單據，又唔使證明，令政客有機可乘，爭相博大霧，當正納稅人係羊牯。
呢嗱，傳媒翻查過去一年嘅報銷紀錄，發現唔少蠱惑招數。有啲議員每個月報銷嘅數目一模一樣，有啲取齊頭數，有啲就隨意報銷，個個都幾乎用盡每年報銷嘅上限十九萬多元，你話係咪算死草吖？如果話當中冇蠱惑，細路仔都唔信喇。
最離譜就係，立法會指引寫明根據實際報銷，使幾多報幾多，但家陣就變咗鍾意報幾多就幾多，完全無王管，指引形同虛設。其實，廉政公署早就注意到呢個漏洞，曾建議要求議員提供單據，但由於多數議員反對而不了了之，卒之搞到烏煙瘴氣，亂象叢生。呢班政客平時扮晒嘢，企喺道德高地指指點點，而自己貪便宜就唔出聲，有口話人冇口話自己，唔止虛僞，簡直無恥！
講起無恥，呢班政客食相再難睇都仲有吖。本報曾踢爆，唔少議員以「工作需要」為理由，豪花公帑購買最新、最潮嘅電子影音產品，手機要最新款、電腦要最名牌、打印機要最多功能、電視機要大屏幕，務求將每年一百七十幾萬元實報實銷嘅辦事處開支，同埋最多十萬元購置資訊科技及通訊設施嘅資助攞到盡。最離譜嘅係，前排立法會工商事務委員會班議員被踢爆濫用公帑遊埠，為求使晒五萬五千元海外職務訪問開支，居然山長水遠飛去聖城耶路撒冷「考察創新科技」，簡直九唔搭八。
正所謂，其身不正，何以正人。呢班政客自私貪婪，食相難睇，誠信早就破產，加上不務正業，郁吓就拉布、流會，有破壞冇建設，更加係神憎鬼厭。近年立法會形象插水，民望低處未算低，淪為市民口中嘅「垃圾會」，唔係冇理由o架。
總而言之，議員報銷制度漏洞多多，問題百出，唔止不合時宜，而且隨時衍生腐敗，唔該當局盡快檢討，堵塞漏洞。須知公帑一分一毫都係納稅人嘅血汗，唔可以任由呢班政客予取予求，中飽私囊o架，叮！
第一手消息請下載on.cc東網
