「恐嚇信」劈頭第一句就鬧黃之鋒「臭罌出臭草」。（受訪者提供）
大學聯招前日放榜，成績備受關注嘅學民思潮召集人黃之鋒自爆已有大學取錄，但就拒絕透露係邊一間。不過，部分「有心人」早前唔知係咪收錯風，以為之鋒入硬香港大學、中文大學，先後向兩間大學寄恐嚇信，抬頭寫明係畀黃之鋒，威脅佢唔好再搞咁多嘢，可憐兩大學生會代收信件虛驚一場。
我哋向中大學生會取得呢封比較似係家書嘅「恐嚇信」，署名「人民」劈頭第一句就鬧之鋒「臭罌出臭草」，受陰招洗腦、銀彈引誘，破壞「立法局」云云，仲苦口婆心勸之鋒「不要學你前輩陳日君、陳方安生、李柱銘」，要「放下屠刀，做個真正好市民」喎！唔講仲以為之鋒學咗民主阿婆同李漢奸咁去歐美「唱衰香港」。
中大學生會成員仲透露，佢哋成日收到唔同類型嘅恐嚇信，幾乎一個月幾封，大致都係恐嚇佢哋咪再「攪攪震」，所以佢哋都係嚇大唔驚，反而收到畀之鋒嘅「家書」仲出奇。睇嚟寄件人要再打聽吓之鋒究竟入邊間大學喇！
第一手消息請下載on.cc東網
