碧基放「詐彈」玩九霄驚魂！巴塞尋晚同赫爾辛基拍跳，大軍抵達芬蘭前受到「詐彈襲擊」，百厭星碧基竟然喺機尾位置掟臭彈，玩殘成班機員同乘客！呢排咁多空難，碧基咁大個人仲搞啲咁嘅嘢，真係五行欠打，難怪巴塞會方要公開道歉！

碧基搞出一幕九霄驚魂，乘客多得佢唔少。（互聯網圖片）

巴塞飛去芬蘭赫爾辛基嘅航程約3小時40分鐘，但短短機程一樣嚇到班乘客鼻哥窿冇肉！據西班牙《每日體育報》透露，向來百厭嘅碧基唔單止鍾意喺更衣室整蠱隊友，就連搭飛機都一樣癲喪，無端端走去機尾附近位置掟咗粒臭彈，一班空姐同乘客全部「中招」，個個面有難色兼掩住個鼻，氣氛一度緊張。

3巨頭機場拍板買華美倫

幾名空姐隨即安撫乘客，兼且猛噴空氣清新劑，事件足足擾攘咗10分鐘。喺飛機製造恐慌兼影響到其他乘客，碧基呢鋪玩出禍，連累巴塞會方要向機組人員同乘客公開道歉，呢鋪真係多得碧基唔少！

講開巴塞後防，會長巴度美奧趁大軍飛赴芬蘭前，喺埃爾普拉特機場嘅登機閘口同正、副體育總監蘇比沙列特及美斯迪，開咗個為時15分鐘嘅「快會」，3巨頭已經拍板收購阿仙奴中堅華美倫，相信呢單轉會好快成事。至於上周五到瑞士洛桑國際體育仲裁法庭，出席長達5粒鐘聆訊嘅蘇亞雷斯有冇得減刑，8到10日就會有結果。