政壇：林嘉芬買八鄉地 發叔都話有問題
地政總署助理署長林嘉芬早前被揭發同丈夫喺元朗買入逾八百萬平方呎嘅土地，之後又去城規會申請擴大建屋比，被質疑涉利益衝突。新界鄉議局主席劉皇發（發叔）被稱為「新界王」，喺新界梗係多土地啦，但我哋尋日同佢講到林嘉芬買地事件，連佢都話林有問題。發叔話，林嘉芬話晒係政府官員，始終都要避嫌，好多時如果官員牽涉土地問題，被調離負責相關土地範圍嘅職務都係好正常。不過，發叔就話未知林嘉芬買邊幅地，要睇下資料先喎。
設計圖片及對白
曾憲強：衰身份敏感
我哋再追查之下，發現原來林嘉芬同丈夫買入嘅土地位處八鄉範圍，咁八鄉鄉事委員會主席曾憲強又點睇呢？曾憲強話，其實林嘉芬都有權買地嘅，而且佢跟足既定程序申請擴大建屋比，又有作出申報，所以唔涉及隱瞞，如果係普通人嘅話，成件事就冇問題，可能佢真係想退休之後隱居同耕田呢，只係林嘉芬嘅身份敏感，但講到件事係咪涉及官官相衞，又或城規會有冇因為林係高官而特批嗰塊地嘅建屋比囉喎，就真係唔知嘞。
有傳林得罪唔少人
其實發叔同曾憲強都唔係太想講林嘉芬單嘢，又話同林嘉芬唔係太熟，所以唔作太多評論。咁究竟林嘉芬嘅為人係點呢？有地區人士透露，林嘉芬原來喺新界區得罪咗唔少人，批評佢平時處理嘅土地問題就乜都唔得，但自己買地就乜都得，所以佢呢次買農地事件令好多人都睇唔過眼，話唔定有人篤佢都唔定。其實講到尾，為人係點都係另一回事，但身為政府官員，政治智慧同政治敏感度始終要比其他人高囉！
