政壇：專資會無水沖涼西遊記
踏足世界最長的西伯利亞鐵路，係唔少旅行家嘅夢想。香港專業及資深行政人員協會一眾成員早前就組隊上征途，身兼理事嘅工業總會榮譽主席鍾志平同新華旅遊董事總經理楊章桂芝（Cindy）齊帶隊，登上世界八大列車之一嘅「金鷹號」向西探索。列車內籠豪華，魚子醬源源不絕奉上，可惜有晚火車「甩轆」唔夠供水，一度無水沖涼。
黃偉雄、鍾志平（前排左及右）與財務長陳記煊夫婦（後排右及中）與團友Nelson（後排左）心情興奮。（受訪者提供）
遊西伯利亞十一日，團費高達十幾萬，常務副會長黃偉雄、廠商會副會長顏吳餘英夫婦同「多士爐大王」葉傑全夫婦等，齊坐豪華專列。
團友先飛到蒙古烏蘭巴托，欣賞外蒙風光，再途經有西伯利亞明珠之稱嘅貝加爾湖、新西伯利亞，到訪歷史名城喀山、克里姆林宮等。
西伯利亞鐵路全長達九千公里，真係坐火車都坐到悶，但近日空難頻頻，團友都話坐火車安心啲。雖然「金鷹號」豪華，但水缸容量有限，話說有晚團友沖涼時大開水喉，翌日發現一滴水都無，狼狽到極，要職員加水補救。
