政壇：搞搞政：克勤仔抽好籤調掌環委會
立法會十月復會後，隨即會上演「三堆一爐」拉布戰，再加上能源組合檢討、機場第三條跑道環評報告等，環境局局長黃錦星肯定有排煩。但有熟悉環保問題嘅政界人士就預言，立法會環境事務委員會（環委會）未來兩年將會無風無浪，皆因上述幾項環保議題，有啲早就過咗環委會嗰關，轉咗手畀財務委員會，有啲就根本唔屬於環委會職責範圍，有立法會其他事務委員會代勞。將喺未來兩年接掌環委會主席一職嘅議員陳克勤，肯定唔使好似財委會主席吳亮星咁，畀班委員集體舉紅牌抗議。
設計圖片及對白
喺立法會放暑假前，多項由環境局負責嘅政策或撥款接連遇到挫折，須喺復會後慢慢執手尾，包括「三堆一爐」撥款、小蠔灣廚餘回收中心同活化改復修堆填區計劃等，但呢三項議題一係就已提上財委會等待最後表決，一係就純粹因為當局唔記得「吹雞」先畀泛民成功突襲，最後遲早都會重新獲得通過。
棘手議題 屬其他會
除咗呢三項舊議題，環境局未來兩年仲有三項幾棘手嘅新議題排住隊上立法會，包括能源組合檢討、第三跑工程對中華白海豚嘅影響，以及有關訪港船隻嘅廢氣排放問題，三者都涉及龐大商業利益。之不過，呢三項議題雖然都係環境局有份負責，但係喺立法會層面，就分別屬於經濟發展委員會或交通事務委員會嘅職責範圍，環委會隨時完全唔使參與，就算要參與都係做吓配角，總之克勤仔今次就抽到支好籤喇！
