政府為淵驅魚 激進不愁客源

所謂君子動口不動手，立法會係莊嚴嘅議事堂，議員理應係謙謙君子，唔啱咪傾到啱囉，點解家陣變成山野村夫咁，一言不合就郁手動粗呢？原因其實一字咁淺，政客走激進路線有市民支持，而且年輕粉絲團隊仲不斷壯大添，喺「市場導向」下，立法會唔變成鬥獸場至奇。

唔係太一叮吹水o架，有網上調查發現，有七成十八歲至三十歲青年不滿議員掟嘢、離席抗議等激進行為；反對拉布嘅則超過五成。冇錯，表面睇嚟反對議會邀進行為，仍然係年輕人嘅主流意見，但係七成反對者以外嘅三成人，即使唔係全部支持，起碼都唔反感，稱之為「準激進派」絕不為過，再比較番歷屆立法會選舉結果，激進派嘅得票率只不過一成左右，可見後生仔女已經成為激進勢力嘅大票倉，激進光譜有進一步擴大之勢，立法會接住落嚟只會更加嘈喧巴閉，更加暴力，市民想耳根清淨都難。

話時話，年輕人愈嚟愈激，唔使進行科學調查，只要睇吓近排啲抗爭行動就知嘞，無論係反新界東北撥款衝擊立法會，抑或係預演佔中，年輕人基本上無役不與，仲要係次次打頭陣。可能有人會問，班後生仔因乜解究有書唔讀，有工作唔做，成日搞搞震o架？即係咁，年輕人本來就血氣方剛，熱情洋溢，遇到認為唔合理嘅事，傾向挺身而出。仲有呀，今時今日特衰政府施政冇瓣掂，年輕人既睇唔到前景，亦睇唔到希望，第樣唔講，房價長年居高不下，大批年輕人望樓興嘆，莫講話向上流動，連結婚生仔都唔敢奢望，佢哋搵個怨氣宣洩口又有乜出奇吖。一句講晒，有頭髮冇人想做瘌痢，吓吓出嚟衝出嚟撞，貪過癮咩！

當然喇，睇到港府施政咁無能，何止後生仔女不滿，不少成年人亦心中有火，於是咪選班激進政客入議會，羞辱吓班廢柴高官，消消氣都好吖嘛。再講吖，立法會有名你叫「垃圾會」，政客即使唔爆粗掟嘢，都係遲到早退，又或者開會睇吓艷照發吓噏風，有幾個正經做嘢呀，五十步笑百步，根本無乜好揀。

計太一叮話齋，激進政客嘅最大支持者其實唔係年輕人，而係不斷犯錯嘅跛腳政府。正所謂神一樣嘅隊友，倒不如豬一樣嘅對手，下次選舉，激進政客不妨考慮邀請高官站台，話唔定叫好叫座呢，叮！