廣東有句俗話叫「扯貓尾」，意思即係互相推卸、互相做戲咁解。呢，搞到滿城風雨嘅高鐵延誤醜聞，由爆發之初，到嚴重超支，港府同港鐵都未停過扯貓尾，表面上互相指摘，實際上圍威喂企圖蒙混過關。

咪以為港鐵行政總裁韋達誠提早執包袱，高鐵延誤醜聞就告一段落，戲肉家陣先上演咋。港鐵近日完成高鐵工程最新造價估算，預算可能高達七百至八百億元，即係話，港府原先批出嘅六百五十億元一定不敷應用，隨時要填氹一百五十億，加上距離完工仲有兩年幾，中間會唔會再有不測之風雲，成本會唔會繼續上升，真係冇人敢寫包單。

即係咁，高鐵超支已成定局，問題係邊個孭起條數先？平時洗腳唔抹腳嘅港府，今次竟然罕有地擺出寸步不讓嘅姿態，唔肯孭起條數。運輸及房屋局早前去信港鐵，表明「政府非常不可能就項目提供任何額外資金」，意味港府唔會為超支包底。不過咁，港鐵亦不甘示弱，聲稱高鐵工程係由港府委託港鐵承造，除非港府有證據向法庭證明港鐵未有盡力而令工程延誤，否則港鐵概不負責咁話。

表面睇，雙方態度強硬，睇真啲，不過互相做戲咋。嗱，莫講話港府嗰句「非常不可能」模棱兩可，非常可疑，就算最後真係由港鐵孭起條爛帳，最終咪又係由市民埋單。係人都知，港府係港鐵最大股東，如果由港府填氹，即係由納稅人埋單；相反，如果由港鐵孭起條數，羊毛出自羊身上，最後咪又係加價彌補，點計都係市民受害嘅咋。

講開又講，高鐵醜聞只係冰山一角咋，十大基建之中，有邊一樣唔係延誤超支吖？好似港珠澳大橋咁，當局話喎，由於香港口岸填海工程石料不足，加上施工困難，隨時無法如期於二○一六年通車，簡直係藉口多多。唔使問阿貴，港珠澳大橋延誤，結果一定又係超支嘅喇。至於港鐵沙中線、西港島線、南港島線及觀塘延線，亦無一幸免統統誤期；西九文化區更加唔使講，分分鐘爛尾都有之。再加上爭議不絕嘅機場第三條跑道，隨時過千億都埋唔到單。咁多基建工程齊齊延誤，又齊齊超支，你話港府點樣填氹吖？

最好笑嘅係，財爺曾俊華最近喺網誌發功，話政府過去幾年開支高速增長，為免出現「結構性財赤」，要求各決策局同部門節省百分之一開支作為儲備喎。鬍鬚曾今次可能冇講錯o架，港產官僚施政無能，基建超支「高速增長」，多多錢都唔夠喇，出現結構性財赤又有乜出奇，叮！

第一手消息請下載on.cc東網iPhone/iPad/Android/Windows Phone Apps