公公婆婆也佔中 安老卸膊乞人憎

呢，有金融機構訪問二十至五十五歲在職人士後發現，以十分為滿分嘅話，佢哋嘅退休信心指數跌至五點五分，好多人都擔心通脹同積蓄唔夠。鬼咩，退休所需開支愈嚟愈多，市民點會有信心吖。受訪者普遍評估退休後每個月平均需要一萬六千元，比兩年前足足增加六千元左右，埋單計數，如果冇四百萬揸手，退休後冇可能安枕無憂。

打工仔退休後生活難以為繼，講得好聽啲係老唔起，講得難聽啲即係臨老過唔到世。難為港府經常將安老政策三條支柱，即係強積金、個人積蓄同綜援掛喺口邊，強積金同綜援唔講嘞，前者回報低行政費高，直情搵笨，後者覆蓋面有限，只能確保受助人唔會凍親餓親，根本唔係咩「安老」政策，至於個人積蓄咯喎，調查結果清楚不過，大部分打工仔手停口停，搵朝唔得晚，仲叫佢哋儲埋棺材本喎，同「何不食肉糜」有咩分別吖！

政府靠得住，豬乸會上樹，市民想安享晚年，睇怕都要自求多福咯。呢嗱，上述調查就發現，逾四成受訪者表示會考慮唔喺香港退休，而內地就係其中一個熱門選擇嘞。

即係咁，呢個政府縮骨卸膊就人盡皆知o架啦，話就話「老有所養」，實際上資助院舍宿位長期供不應求，當局唔諗辦法增加供應，一味鼓勵「居家安老」，但就乜嘢配套同支援都冇，其實即係叫老人家食自己。不過咁，北上養老講就輕鬆，做起上嚟唔係咁易o架。唔少長者喺內地無人無物，出起事上嚟隨時叫天不應叫地不聞，更何況佢哋冇內地醫保，想睇個病都難。再講吖，今時唔同往日，內地生活指數愈嚟愈高，長者北上養老，日子分分鐘比喺香港更難捱。

唔係太一叮亂講o架。政府舊年十月搞咗個「廣東計劃」，容許長居廣東嘅長者領取生果金，到依家只吸引一萬七千人參加。無他嘅，每個月千零蚊生果金就想打發人返內地養老，長者至冇咁笨啦！

點講都好，香港嘅問題只能靠香港解決，咪使旨意將老人家當人球咁大腳傳中吖。本周日之嘛，兩千名公公婆婆操去特首辦爭取全民退休保障，有人擔心有生之年見唔到落實嘅一日，真係聞者心酸。唔該特衰政府咪再玩拖字訣，逼到公公婆婆抬棺材佔領中環就唔好玩嘞，叮！