港府卸膊棄監管 西九恐成獨立國

嗱，議員嘅擔心唔係杞人憂天o架。有辦你睇，好似被形容為獨立王國嘅港鐵，明明港府係最大股東，到頭來港鐵惡晒，早前高鐵爆出延誤醜聞，港鐵居然指示港府一齊欺瞞公眾，簡直係妹仔大過主人婆。仲有呀，港台明明係由公帑營運嘅官方機構，點知製作嘅節目陰陽怪氣，下下同港府唱反調，港府根本無可奈何。所以話，M+博物館一旦由全資附屬公司獨攬大權，難保唔係另一個獨立王國嘅咋。

面對種種質疑，西九管理局行政總監連納智解釋，M+博物館係具有代表性嘅博物館，需要由專人謀劃發展，因此建議以獨立架構處理，以免出現外行領導內行嘅情況喎。而民政事務局亦幫口，聲稱咁做係同國際接軌，又強調將來相關公司嘅人事及財政措施仍需由西九管理局批核，已有足夠監管，拍心口保證唔會變成無王管咁話。

即係咁，連納智身為港府高薪禮聘嘅「外人」，有咁嘅諗法一啲都唔出奇，但民政事務局身為政府機關，負有監管統籌重任，咁輕易就主動棄權，就真係咄咄怪事嘞。係人都知，監管權易放難收，最怕有事鍾無艷，無事夏迎春，M+博物館大權在握，自把自為，錢就識得問政府攞，但就唔聽政府支笛，到時認錢唔認人，後悔已經太遲。

講開又講，西九文化區搞嚟搞去，到家陣仲係爛地一塊，而且波折重重，問題多多，先有天幕設計推倒重來，後有撥款不敷應用，第三期工程隨時爛尾；近日又因為受立法會拉布影響，M+博物館仍未獲財委會撥款，要延遲至二○一八年先至完工。咁仲唔止，M+連購買藝術品都符碌過人，被質疑入錯貨，物非所值。所以話，冇咁大個頭唔好戴咁大頂帽，港產官僚眼高手低，結果咪自暴其醜囉。

正如有人話齋，羅馬都唔係一朝一夕建成，香港不嬲係文化沙漠，唔會因為起咗一幢富麗堂皇嘅建築物，突然變成文化綠洲。港府仲大言不慚，要將西九建成西班牙畢爾包、美國古根漢、法國龐比度喎，簡直係不自量力。不過講到尾，前朝種禍，後人遭殃，如果唔係貪曾政府好大喜功，又點會留下咁多爛攤子要人執手尾吖，叮！