收黑金食相難睇 特務黨厚顏無恥
淫媒賤格，政客邋遢，互相勾結，臭上加臭。淫賤黎以黑金操縱泛民醜聞曝光後，涉事政客成為千夫所指，有人死口唔認，有人避重就輕，有人倒打一耙，有人龜縮潛水，可謂醜態百出。最離譜嘅係，有人一直將巨額捐款據為己有，直至醜聞曝光後至急急補鑊，如果話當中冇蠱惑，三歲細路仔都唔信喇！
面對各界要求徹查黑金醜聞嘅強烈呼聲，立法會個人利益監察委員會終於出手，要求涉嫌收錢嘅工黨李卓人、社民連梁國雄、公民黨毛孟靜同民主黨涂謹申提交資料，交代事件。其中收咗一百五十萬元嘅李卓人龜縮多日後出來解畫，聲稱有關捐款係代工黨收取，包括八個月前收取嘅五十萬元，曾計劃用來成立環保社企，惟因社企至今未開戶，款項先至由佢保管；佢仲話咁做不涉個人利益，毋須申報喎。
嗱，呢啲咪就係狡辯囉。如果真係搞社企，點解唔光明正大捐畀政黨，而要以個人名義收取呢？點解要等到醜聞被踢爆先至將錢轉畀工黨呢？唔通佢連利息都想吞埋？
收取黑金公私不分，條數唔清唔楚都算嘞，李卓人仲話不涉個人利益，毋須申報，簡直侮辱港人智慧。其實，根據立法會嘅《議事規則》，任何議員如不遵從規則，冇登記個人利益、披露個人金錢利益等，最嚴重嘅可被暫停職務。李卓人身為老牌政棍，明知規則，仲要狡辯，你話佢係咪厚顏無恥吖？
講到政客無恥，真係數埋一大籮。呢，尋日又有市民踩上有「民主阿婆」之稱嘅陳方安生辦事處抗議，要求佢交代收受淫賤黎黑金事件。冇錯嘞，民主阿婆身為前政府高官，一方面領取政府長俸，一方面收取淫賤黎黑金，而且公然替壹淫媒乞廣告，利益衝突嘅嫌疑水洗都唔清，唔該廉政公署及警方速速做嘢，徹查到底，唔好又輕輕放過吖。
最好笑嘅係，黑金醜聞曝光後，政客唔止拒絕交代，有人仲話係「白色恐怖」添，家陣立法會介入調查，有人一百八十度轉變，話可以公開銀行戶口資料喎。其實，呢啲只不過係掩人耳目，好多人有幾個戶口，只係公開一兩個，你話有乜用吖。
正所謂，國之將亡，必有妖孽，有人將呢班收取淫賤黎黑金嘅泛民政客稱為「特務黨」，一啲都冇講錯，佢哋狼狽為奸，勾結外部勢力，禍亂香江，真係有特殊任務o架。太一叮都係嗰句，宜將剩勇追窮寇，不可放過特務黨，對於呢班禍亂香港嘅牛鬼蛇神，一定要追究到底，千祈唔好手軟吖，叮！
