貪污投訴創新低 皆因廉署爛招牌

唔係太一叮誇張，數據最能說明問題。廉署接獲嘅貪污投訴持續下跌，上半年較舊年同期足足下跌百分之七，比九七年勁跌近兩成，其中涉及政府部門嘅貪污投訴更加大跌一成三。鬼咩，本報揭發前特首貪曾「貪盡海陸空」，眨吓眼過咗兩年有多，而前廉政一哥貪湯被踢爆「茅台換政協」亦過咗成年，點知廉署到依家仲係唔嗲唔吊，以前廉署查案密密實實，家陣變成廉署查案沒有下文，好難唔令人質疑官官相護。哀莫大於心死，既然所謂肅貪倡廉只係大隻講，投訴咪盞嘥氣。

姑且聽吓廉署點解畫。佢哋話喎，貪污投訴時有升跌，數字下跌可能反映政府部門、私營機構及市民防貪意識不斷提高。實情係點？早前港大民調顯示，市民對香港廉潔信心創歷史新低，同國際廉政排行榜上香港每況愈下相呼應，而早前廉署自己嘅民調亦反映香港貪污普遍，認為未來一年貪污情況持續惡化嘅受訪者高達四成添。難為廉署仲誇口乜鬼防貪意識提高喎，簡直唔知醜字點寫。

話時話，市民當廉署透明，最開心嘅梗係貪官喇。正如有前廉署人員話齋，廉署主要係接獲投訴後進行調查，市民唔願意舉報，就好難發現貪污案件。換句話講，廉署唔做嘢，市民唔想投訴，而投訴數字低，又令廉署做唔到嘢，形成愈嚟愈貪嘅惡性循環。你哋話嘞，廉署淪為無牙老虎，貪官係咪掩住半邊嘴笑吖！

嗱，唔係講笑。絕代雙貪劣迹昭彰，到家陣都未落鑊，已經天怒人怨，壹淫媒主席淫賤黎嘅政治獻金醜聞最近又搞到滿城風雨，多個團體到廉署舉報，如果又係高高舉起，輕輕放下，一味「hea」查了事，香港容乜易再次回歸——回歸上世紀七十年代無官不貪嘅黑暗年代。

都係嗰句，擒賊先擒王，廉署想省番靚個招牌，捉雙貪同淫賤黎祭旗就得嘞。有辦你睇，內地反腐雷厲風行，連前政治局常委周永康呢隻大老虎都被關入籠，民眾知道反腐玩真咯喎，自然拍爛手掌啦。

講到打老虎，有樣嘢太一叮始終唔明，周老虎勢力龐大，盤根錯節，中央一樣可以手起刀落。面對雙貪同淫賤黎呢類小老鼠，如果廉署咁都手軟嘅話，不如改名做「護鼠公署」或「貪政公署」好過喇，叮！