政淫勾結，人神共憤。有「淫賤黎」之稱嘅壹淫媒主席黎智英被踢爆過去兩年向泛民政團同個人秘密捐款逾四千萬元，操控反對派禍亂香港，醜聞曝光，全城嘩然，要求徹查事件、剷除金權政治嘅呼聲一浪高過一浪。
呢嗱，幾日來都有市民及團體上街聲討，對淫賤黎與泛民政客狼狽為奸表達強烈不滿。有人向廉署舉報；有人向立法會、警方同稅務局連環舉報；有立法會議員聯署要求個人利益監察委員會跟進事件；亦有人促請立法會引用特權法調查。一句講晒，家陣群情洶湧，睇吓呢班牛鬼蛇神又走得去邊。
開講有話，錯就要認，打就企定。既然黑金醜聞曝咗光，已經遮無可遮，正常嘅做法係向市民坦白交代，究竟收咗幾多錢，同埋點樣用呢啲錢，畀公眾評判，點知有人居然死口唔認，仲話人哋抹黑添。邊個咁厚顏無恥？咪就係白鴿黨嘅涂謹申、公文袋嘅毛孟靜同陳淑莊囉，最好笑嘅係，有人為咗劃清界線，居然話同淫賤黎只係「見過面」、「握過手」嘅泛泛之交喎。咁就奇嘞，淫賤黎親口承認向泛民秘密捐款，包括呢三人在內，而佢哋就否認收過錢，你話究竟信邊個好呢？唔通中間人落咗格？
真的假不了，假的真不了，真相只有一個，只要有關部門依法辦事，揸正嚟做，一定可以查個水落石出，令牛鬼蛇神無所遁形。最怕當局為淫媒保駕，為政客護航，到頭嚟又係不了了之咋。係人都知，壹淫媒過去已經一百多次違反《淫褻及不雅物品管制條例》，案底仲厚過電話簿，但次次都獲司法機構放生，最多只係輕輕罰款了事；至於泛民政客咯喎，咁多年來被揭發涉及利益衝突嘅醜聞已多不勝數，結果全部獲法外開恩，有事變冇事，問你服未。
所以話，金權政治之所以氾濫成災，香港之所以烏煙瘴氣，唔係因為淫賤黎有幾大本事，亦唔係因為泛民政客有幾無恥，而係因為港產官僚及北大人是非不分，助紂為虐。今時今日，愛國有罪，賣國有獎，唔怪得淫賤黎有恃無恐，愈墮落愈快樂喇。
其實，無論政客點樣狡辯，市民眼睛係雪亮嘅。有項最新民調顯示，市民對政黨觀感全線下跌，近半受訪者認為政黨只為自己利益。呢項調查仲未反映捐款醜聞o架，如果計埋呢項因素，政黨形象跌到趴街都似。
正所謂，多行不義必自斃，淫賤黎同政客狼狽為奸，禍亂香江，搞到天怒人怨，全城聲討，可以講係咎由自取。話時話，呢班政客平時扮晒正義，郁吓就話要引用特權法調查，依家輪到佢哋自己身有屎，不妨睇吓佢哋會唔會又係雙重標準，嚴以律人，寬以待己，叮！
第一手消息請下載on.cc東網
