源頭減廢得把口 垃圾徵費唔易搞
香江垃圾為患，港府束手無策，惟有打市民荷包主意，密鑼緊鼓準備開徵垃圾費。呢招靈唔靈冇人知，但肯定治標不治本，如果當局唔從源頭解決問題，無論點樣徵費，垃圾圍城都只係時間問題咋。
係咁嘅，經過四個月嘅諮詢，垃圾徵費計劃終於殺到嚟。可持續發展委員會主席陳智思話喎，過半數意見贊成按戶收費，另有近四成希望以整幢樓形式收費，而佢個人就認為可以推行混合模式，即同時按戶及按幢收費，委員會近期會先討論收費水平，下個月至討論收費機制，十月份向政府提交報告。
其實，講來講去都係一個錢字啫。垃圾問題拖無可拖，徵費似乎避無可避，採取乜嘢形式都好，市民最關心嘅始終係收幾多錢。陳智思承認，如果收費太高，會影響市民執行意願，亦過唔到立法會呢關，反而從低收費開始，可以引導市民逐漸減少製造垃圾。所以咯喎，當局大致傾向將收費定喺低水平，例如每月三十元咁話。
咁又係吖，垃圾徵費始終唔係治本之道，如果超出一般市民可承受嘅水平，一定得唔到民意支持，隨時以爛尾收場嘅咋。話時話，推行垃圾徵費嘅宗旨係污者自付，利用經濟誘因令市民主動減少垃圾，本來係無可厚非嘅，問題係港產官僚減廢不力，治污無能，除咗攤大手板向市民攞錢，咁多年來幾乎乜都冇做過，唔怪得令人反感喇。唔係冤枉佢哋o架，廢物回收似有還無，強制分類得個講字，源頭減廢毫無進展，港府靠把口推動環保，垃圾徵費點可能唔阻力重重吖。
老實講，為環保出分力，絕大部分市民都唔會介意，亦樂意付出適當代價，但最重要嘅係，港府同樣要有承擔及付出，唔可以收完錢就關人個關。係人都知，處理垃圾嘅關鍵係源頭減廢，如果港府淨係得把口講，乜都唔做，就算徵收幾多垃圾費，擴建幾多個堆填區，興建幾多個焚化爐，都係嘥氣咋。
嗱，前排有項調查發現，將軍澳七成受訪者支持以「源頭減廢」為先，而呢方面正正係港府做得最差嘅。上個禮拜有環保團體實地統計發現，本港公用三色回收箱與垃圾桶比例嚴重失衡，喺重災區沙田圍，每三十七個垃圾桶只得一套回收箱，你話嘞，咁又點樣推行源頭減廢吖？
無論點都好喇，向市民開刀始終不受歡迎，如果當局一意孤行，真係要推行垃圾徵費，咁唔該做好其他配套設施先，例如加強回收等等，否則，盞弄巧反拙，唔衰攞嚟衰，叮！
