籃球世界盃本月底喺西班牙開打，力爭衞冕嘅美國男籃尋日首度進行公開對抗賽，不過就有溜馬前鋒保羅佐治（Paul George）喺比賽尾段中招，右腳脛骨同腓骨恐怖骨折，新季NBA幾可肯定唔使預佢。美媒炮轟美國籃協選址唔合規格，係累死「PG24」嘅兇手！

保羅佐治斷腳後即場接受治療。（美聯社圖片）

保羅佐治要抖9至12個月，新季NBA應該唔使預佢。（美聯社圖片）

20人嘅美國男籃大軍尋日喺拉斯維加斯進行對抗賽，保羅佐治喺第4節初段封阻占士夏登（James Harden）時，落地不穩導致右腳小腿90度屈曲，場面極之恐怖，夏登當堂驚到唔敢睇，艾榮（Kyrie Irving）亦嚇到喊。保羅佐治隨即被送往醫院接受手術，醫生證實佢右腳脛骨同腓骨骨折，手術後已將鋼釘鑲入右腳，要留院2至3日先可以出院。

以勒邦占士（LeBron James）為首嘅球星紛紛透過twitter祝福保羅佐治，身處上海嘅高比拜仁（Kobe Bryant）亦有打長途電話問候「PG24」。《ESPN》記者雲賀斯炮轟美國籃協選址有問題，指呢個Thomas & Mack中心唔合乎規格，籃球架同邊線距離太近，令佐治落地後要避籃球架釀成今次意外。

長抖9至12個月 班主擬禁球星為國效命

孭晒鑊嘅美國籃協主席高蘭謝路（Jerry Colangelo）宣布停訓一周，佢已經致電溜馬班主西蒙（Herb Simon）交代情況，溜馬總經理布特（Larry Bird）亦發聲明表示「關注保羅佐治傷勢」。據《今日美國》透露，有NBA球隊班主及總經理召開緊急會議，計劃唔再畀陣中球星為國效命！

雖然保羅佐治尋日透過twitter「報平安」：「我會以更強姿態重返戰場！」不過《ESPN》首席醫學專家卡普蘭預計，「PG24」有可能要休戰9至12個月，即係來季NBA基本上唔使預佢，溜馬新季隨時係咁先！

各界反應

勒邦占士（騎士前鋒）：一落機就聽到呢單消息，祝迅速康復！

杜蘭特（雷霆前鋒）：天佑保羅佐治，希望上帝賜予力量，令你盡快康復。

甘巴獲加（山貓控衞）：見到1個好人兼好球員受重傷實在令人氣憤。

迪安迪佐敦（快艇中鋒）：祝保羅佐治早日康復，我哋都喺你身邊。

蘇寧加（塞爾特人前鋒）：祝福保羅佐治。我冇睇到亦唔想睇番佢

點傷，請唔好喺網上Post條片出嚟。　

體壇恐怖斷腳事件：奇雲韋爾（籃球）

簡評：上年NCAA 8強戰，路易斯威爾後衞奇雲韋爾（Kevin Ware）飛身封阻對手，落地之後右腳小腿骨折，骨頭穿破皮肉，足足休戰超過1年，傷勢同保羅佐治相似。

伊度亞度達施華（足球）

簡評：08年2月為阿仙奴喺英超披甲鬥伯明翰，「兵工廠」前鋒伊度亞度達施華被對方守將馬田泰萊剷到左腳小腿骨折，休戰接近1年。

施斯（足球）

簡評：04年効力利物浦嘅施斯，鬥布力般一戰被踢斷左腳脛骨同腓骨，最後休戰5個月。兩年後代表法國喺熱身賽鬥中國，被鄭智意外撞到右腳骨折，又再養傷半年。