城中鏡：仁濟男女車神諗計籌款
仁濟醫院早前舉行「海外學生仁濟夜慈善餐舞會」，由一班面孔青澀、返港放暑假嘅大學生柴娃娃籌辦，夠晒朝氣同活力。賽車手出身嘅「仁濟男車神」Paul葉恭正同熱愛踩單車嘅「仁濟女車神」Jacqueline湯振玲等年輕總理都有到場，講起創意籌款點子，Jacqueline心思思想搞個單車籌款活動，一於將嗜好化為愛心行動。
葉恭正（左）同湯振玲都熱愛戶外活動，堪稱仁濟男、女車神。
仁濟總理鄭李華熙（右起）、蘇陳偉香、嚴徐玉珊同囡囡嚴紀雯齊着上旗袍，散發中國古典美。
仁濟副主席王賢訊太太朱穎詩（右）產後復出同葉恭正太太林麗珍開心歡聚。
研踩車行善細節
Jacqueline話呢個諗法好初步，事關有太多細節要研究，例如選擇路線時，既要考慮沿途風景好，唔好悶親人，又唔可以同現時某善團舉辦嘅單車籌款活動太相似，所以要再慢慢度橋。
咁阿Paul又會唔會搞個賽車籌款呢？佢話以前的確試過喺珠海舉辦賽車籌款，但係啲戰車要由香港運上內地，手續繁複，使費又大，扣除開支後實際善款唔多，得個做字，所以後來就唔搞嘞！不過，幾年前中港兩地開放香港車到內地自駕遊政策，啲車過關方便好多，日後或者可以諗吓喎！
當晚到場名流逼爆，仁濟副主席嚴徐玉珊全家總動員，事關嚴家孻仔嚴子諭係海外學生會主席。仁濟主席Susan蘇陳偉香都現身招呼賓客，佢透露十一月初將舉行一場破健力士紀錄的「萬人手語傷健傳愛大行動」，到時將招募一萬名義工齊做《獅子山下》手語歌，以宣揚傷健共融訊息。Susan笑言唔識手語，所以最近密密練兵，希望到時唔好失威咁話。
