蛇王議員何其多 垃圾議會嘆奈何

太一叮之唔係講緊尊貴嘅立法會議員囉。呢，二○一三至一四立法年度啱啱結束，又到派成績表嘅時候嘞。本報翻查七十位議員喺立法會各大小會議嘅出席情況，結果兩名建制派議員蟬聯「立會大懶蟲」，加上另一位直選反對派議員，合組成「立會三蛇」，佢哋喺多個委員會嘅出席率只有約三分之一甚至不足三成，可以話係神龍見首不見尾。其他小組同委員會嘅出席率同樣慘不忍睹，出席率低過四成嘅議員比比皆是，而且一樣係橫跨左中右，問你服未。家陣立法會內山頭林立，咩建制派、反對派、激進派，名目繁多，搞到人頭昏腦脹，其實使鬼咁煩吖，統統叫「懶字派」咪得囉！

即係咁，有錯要認，打就企定，呢個道理三歲細路仔都識，偏偏大懶蟲藉口多多，死撐到底。有本身係醫生嘅偷懶議員話喎，比起開會，「始終臨床工作重要啲」；身兼資深大律師嘅「大蛇」湯家驊仲啜核，佢承認自己財會出席率低，不過反正撥款「九成都批」，自己缺席對表決結果影響唔大咁話喎。

都啱嘅，呢啲大懶蟲議員多一個唔多，少一個唔少。既然議會工作冇其他工作咁緊要，既然會議有冇你哋出席都冇分別，何必仲要霸住茅坑賴死唔走，係咪應該慎重考慮退位讓賢呢可？

可能有人會話，樹大有枯枝，立法會出幾條懶蟲，唔出奇啫。嗱，呢鋪講法要戒啦。冇錯，本年度立法會三十六次大會，議員平均出席率似乎唔算低，但原來內有蹊蹺，議員只要點個卯就唔當缺席，所以咯喎，遲到者有之，早退者有之，蒲頭一分鐘速閃者都有之，簡直七國咁亂，咪成日搞到流會囉。

針對呢個漏洞，有學者建議實行類似「打卡制」，詳細記錄議員開會時數，再按比例扣減出席率偏低議員嘅薪酬。學者係就係用心良苦，但恐怕都係枉費心機。正如三流愛情小說話齋，得到佢個人唔代表得到佢個心，議員肯乖乖坐足成個會又點吖，上網睇吓艷照、check吓股票行情，掟吓嘢爆吓粗，輕輕鬆鬆又一day，盞嘥氣啦。

講到呢度，作為議員老闆嘅納稅人應該知點做啦，下次一於用選票「杜蟲」！不過咁，放眼垃圾會都係歪瓜劣棗，冇幾個似樣嘅，趕走一條懶蟲，仲會有千千萬萬條懶蟲。公帑焗住倒落海，你都咪話唔無奈，叮！