政壇：胡志強來港又招風雨
繼舊年來港喺美食博覽大力推介美食後，台中市市長胡志強今年再接再厲，來港為將會參展嘅台中食品商打氣。胡志強仲講笑話，兩次來港都受到熱情招待，仲落非常大雨添！舊年就打風，今年就短短數小時內先後多次發出紅色同黃色暴雨警告，令佢印象深刻。
胡志強（前排中）兩次來港都落好大雨，但就獲得熱情招待。
遊北京笑問太陽餅
講起第一次去北京時嘅經歷同感受，胡志強話除咗覺得北京地方好大之外，仲記得當時佢淨係打算去傾經濟，因此帶咗盒太陽餅去做手信。晚上十時工作過後，佢同太太一齊坐的士去天安門廣場，發現人群之中有個男仔一直望咗佢好耐，問佢係咪胡志強，佢心諗已被認出，惟有報以微笑，估唔到個男仔下一句竟然係問佢太陽餅嘅嘢，諗起都覺得好笑。
胡志強仲大方談及女兒胡婷婷同前夫樂壇組合Soler大孖Julio嘅短暫婚姻，佢話有時感情要發生變化都無辦法，當知道囡囡冷靜同堅強嘅外表下受傷很重，最不願意女兒受傷害，但既然囡囡要求佢唔好怪責前夫，佢只好聽個囡囡說話喎！
