醫療投訴拖九年 急驚風遇慢郎中

太一叮唔係亂噏，真有其事。話說林太舊年因腹痛入私家醫院照胃鏡，點知注射鎮靜劑五分鐘後心跳停頓，經搶救後不治。腹痛入院變成陰陽相隔，林生悲痛之餘，想為愛妻討回公道，於是向醫委會投訴，點知泥牛入海全無消息，六個月之後醫委會至通知佢補交個人資料及約期宣誓。你話嘞，呢啲究竟係乜嘢效率吖？

等咗半年至被通知補交個人資料，即係話初級偵訊仍遙遙無期，莫講話正式聆訊。林生最擔心嘅係，醫委會處理投訴一拖再拖，最終可能好似痛失兒子嘅藝人張崇德同劉美娟夫婦咁，要等足九年至有機會搵出真相。當然，如果最後可以真相大白，等幾耐都值得，最怕有人醫醫相護，到頭來又係輕輕放過，咁就真係冤哉枉也。

正如跟進呢單個案嘅立法會議員質疑，急驚風遇到慢郎中，醫委會處理投訴歎慢板，究竟係唔夠人手，拖延時間，定係其他原因呢？該議員前年至今接獲嚴重醫療事故求助個案廿宗，包括有病人死亡，個案早就轉介醫委會跟進，但遲遲未有進展。最離譜嘅係，佢已經將部分投訴人嘅資料轉交醫委會，而對方仲要求提供更多資料，例如要花大量金錢及時間去做專家報告等，搞到有投訴者撐唔落去，隨時要打退堂鼓都似。

其實，醫醫相護呢樣嘢，早就見怪不怪咯。好似張崇德同劉美娟夫婦咁，長子啱啱出世就夭折，向醫委會投訴醫生有失誤之嫌，對方竟以嬰兒夭折很普通為由，指投訴唔成立。如果唔係兩夫婦鍥而不捨，賣樓籌錢請律師同搵專家寫報告，醫委會不得不跟進，事件睇怕不了了之。可惜吖，苦主花費大量金錢及時間，最後話就話討回公道，但嗰位被指「專業水平遠低於一般水平」嘅醫生，亦只係受到停牌兩年嘅處分，問你服未。

話時話，呢啲個案只係冰山一角咋。醫委會每年接獲約五百宗投訴，平均只有廿二宗召開紀律研訊，而且處理投訴時間長到離晒譜，受害人同家屬飽受折磨，怨聲載道。

咁又難怪嘅，醫委會成員大部分係醫學界人士，醫生查醫生，結果係點，大家心照喇。即係咁，醫委會迫於公眾壓力，話就話要增加非業界委員，但如果唔提高處理投訴嘅透明度同效率，消除市民對醫醫相護嘅疑慮，講乜都係假，叮！