雙貪影衰公務員 擒賊必須先擒王
係人都知，香港公務員出名人工高、福利好，連歐美國家都望塵莫及，其中一個原因，就係當局奉行高薪養廉。不過自從「絕代雙貪」呢兩個官場敗類出現後，高薪係咪真係可以養廉，真係令人懷疑。
嗱，廉政公署去年接獲涉及公務員嘅貪污舉報有八百零九宗，當中十五宗被檢控，十一宗罪成。表面睇，舉報數字比前年嘅一千一百多宗下跌。實際上，去年正係「絕代雙貪」貪腐醜聞鬧得滿城風雨嘅時候，貪曾同貪湯淪為人人喊打嘅過街老鼠，大大個「人辦」擺在眼前，係人都怕怕喇。所以話，舉報數字下跌未必代表天下太平，好可能只係腐敗分子心有所懼，先唔敢輕舉妄動咋。
唔係亂噏o架。廉署上月進行民意調查，結果顯示近三成受訪者認為香港貪污普遍，一成七甚至認為未來一年香港貪污情況將會惡化，比率創下四年新高，而且最多受訪者覺得政府官員及公務員嘅貪污情況最值得關注。市民眼睛雪亮，如果香港嘅貪腐情況真係大有改善，公務員真係個個奉公守法，又點會得出呢個民調結果吖。
即係咁，「香港勝在有ICAC」唔止係一句廣告口號，市民對貪污零容忍，對公務員及官員要求「比白更白」，更已成為香港核心價值之一。事實上，過去港英政府推行「高薪養廉」非常成功，回歸後，港府照辦煮碗，甚至將「高薪」發揚光大，可惜橘越淮而枳，高薪唔係養廉，而係養出「絕代雙貪」呢啲大老鼠。
好似貪曾咁吖，年薪幾百萬，比美國總統仲要高，但佢貪遍省港澳，連一隻雞一棵菜心都唔放過，要幾核突有幾核突。而佢嘅難兄難弟前廉政專員湯顯明更加青出於藍，將廉署搞到好似夜總會咁，唔係瘋狂送禮就係茅台漱口。香港法治招牌搖搖欲墜，廉潔排名拾級而下，咪就係拜呢兩個敗類所賜囉。
早前有位警司因為貪圖食肆幾千蚊折扣同埋一樽威士忌，被裁定公職人員行為失當罪成；而一名隧道公司職員更因為執咗一蚊放入褲袋，被控盜竊罪成之餘，連退休金都冇埋。大貪係貪，小貪都係貪，當局依法辦事，無可厚非，奇怪嘅係，廉署調查「絕代雙貪」經年，何解到家陣都未有下文呢？唔通真係「竊鈎者誅，竊國者侯」？
家陣內地捉拿貪官絕不手軟，香港自詡法治之區，冇理由連內地都不如啫。計太一叮話齋，擒賊先擒王，只有盡快將絕代雙貪繩之以法，先至可以殺一儆百吖嘛，叮！
