內地打虎不手軟 香港滅鼠一味拖

呢嗱，中央今次打大老虎，唔止震動國際，更加贏得唔少掌聲。有內地網民形容係幾十年來最開心嘅一日，更加有網民講笑話，中央反貪雷厲風行，遲早反到冇晒官員去開會咁話。不過同人唔同命，同遮唔同柄，香港就唔似得內地嘞，事關「絕代雙貪」前特首曾蔭權爵士同埋前廉政專員湯顯明仍然逍遙法外。廉署話就話立案調查，查貪曾超過兩年，查貪湯亦已超過一年，可惜查嚟查去得個吉，至今依然未有下文，問你服未。

講起就唏噓嘞，香港以廉政及法治著稱，內地則以貪腐及人治臭名遠播，點知時移勢易，家陣內地煥然一新，反貪反得有聲有色，蒼蠅固然大力拍，老虎更加狠狠打，國人拍爛手掌。反觀香港，沒有最醜，只有更醜，高官接二連三捲入貪腐醜聞，尤其係「絕代雙貪」狼狽為奸，一個同富商勾勾搭搭，大搞利益輸送；一個酬酢當工作，茅台換政協，搞到香港廉政英名一朝喪。話「絕代雙貪」係千古罪人，一啲都冇誇張o架。

講開又講，最近淫賤黎黑金醜聞曝光，又同貪曾有關，咪就係貪曾呢個自稱虔誠嘅天主教徒，喺宗教同共產黨之間作出抉擇，為咗爭取面見教宗尋求解脫，竟然涉嫌同意大利政要進行「魔鬼交易」，阻礙港府向意大利交出該國前總理貝魯斯干尼所涉詐騙案嘅資料，仲搵淫賤黎幫手搭路面聖添。貪曾貪威要面，死性不改，唔止影衰香港，仲影衰埋全世界天主教徒。咁你話嘞，廉署遲遲唔將貪曾落鑊，係咪即係畀機會佢繼續遺禍人間，褻瀆宗教吖？

正如學者同立法會議員質疑，廉署如果有心查，查乜都查完，點會搞到家陣冇晒聲氣吖，如果話當中冇不可告人嘅秘密，講都冇人信喇。有人話，香港同內地名義上「一國兩制」，但喺貪腐方面已經「一國一制」，觀乎絕代雙貪呢兩隻過街老鼠依然風流快活，想唔信都唔得喇。

今時唔同往日，家陣內地反貪成績有目共睹，反而港府處理絕代雙貪案一拖再拖，香港呢一制其實比內地嗰一制更不如。計太一叮話齋，絕代雙貪案關乎香港核心價值同埋公眾利益，當局唔好又諗住官官相衞吖，叮！