跨國名店也中招 黑心食品何時了

嗱，內地傳媒揭發，上海福喜食品公司唔止違規以過期肉及次品製作成品出售，仲衰到竄改保質日期瞞天過海，部分食材原料足足過期七個月，早就發霉發臭，真係諗起都作嘔。而且今次中招嘅唔係路邊小攤，而係國際知名餐飲集團，由漢堡包、薄餅、炸雞以至咖啡名店都有份，簡直無孔不入，問你怕未。

咪以為唔返內地食嘢就冇事吖，事關黑心食品早就流出全世界，連日本嘅快餐店都中招，要及時下架停售添，咁你話香港有乜可能獨善其身吖？呢，話口未完，就有網民貼出圖片，顯示香港快餐名店一樣有入口福喜食品，只不過唔係來自上海，而係來自河北。唔係以小人之心度君子之腹，上海話晒係大城市都咁烏煙瘴氣，出名落後貧窮嘅河北會好得幾多，你哋自己諗嘞。

嗱，今次事件搞到本港市民人心惶惶，涉事連鎖快餐店卻模棱兩可，承認美國福喜集團係全球供應商之一，但就強調冇採用上海福喜嘅食品喎，咁河北福喜嘅食品就安全嘅咩？講開又講，涉事連鎖快餐店全球都有分店，一直以來風平浪靜，相安無事，點解偏偏嚟到中國就出事呢？如果話中國唔係假劣毒大國，真係講都冇人信啦。

橘越淮而枳，好多國際品牌喺全世界都安分守己，一嚟到中國就荒腔走板，講到底，根本係中國人嘅問題。呢，好似早前嘅國際藥廠喺中國行賄案咁，呢啲情況絕少喺外國發生，偏偏喺中國蔚然成風。仲有吖，內地每有假劣毒食品出現，背後總有貪官污吏嘅影子。貪官奸商沆瀣一氣，全國上下貪腐成風，黑心食品又點會有絕迹嘅一日吖！

不過咁，如果本港當局用心把關，或者可以抵擋黑心食品入侵，保一方平安。可惜吖，食安中心好似遊魂咁，根本唔知有冇過期肉製品流入本港，淨係一味話會向有關方面了解喎。事實上，由孔雀石綠海產、蘇丹紅鴨蛋到今次嘅過期肉製品，有邊次唔係傳媒揭發在先，食安官僚如夢初醒在後？旨意廢柴官僚把關，真係蚊都瞓蛇都死啦。

民以食為天，食以安為先。港府由民生到經濟冇瓣搞得掂，如果連「食」呢一關都守唔住，搞到市民病從口入，遲早民怨大爆發嘅咋，叮！