台灣出招吸人才 香港遲早無運行

話說台灣當局上個月推出多項措施，放寬港澳留學生居台及工作嘅限制，包括毋須返回原居地，只要獲聘及攞到工作證，就可以留台；經許可居留滿五年，及最近一年嘅平均月入唔低於一定標準，仲可以申請居留添。其實，台灣近年已成為港人升學同就業嘅熱門地點，獲准赴台升學或工作嘅港人數字逐年增加，今次台灣突然放寬限制，好明顯係想爭奪人才。

呢招確實幾吸引o架，台灣大開中門，唔少港生躍躍欲試，有原本想返港嘅應屆畢業生改變初衷，計劃留低搵工，有人甚至已經搵到理想工作，準備申請定居添。正如學生話齋，台灣生活水平較低，而且質素高，居住環境又大又舒服；而香港話就話人工高啲，但生活指數高，租金同交通費昂貴，根本冇錢剩。

本來呢，多數去台灣讀書嘅學生都希望學成歸來，一展所長，弊在香港經濟低迷，加上政治爭拗多多，發展機會愈來愈少，與其返來望天打卦等運到，不如留台發展仲實際喇。回歸以來，港產官僚成日吹水話要推動經濟轉型，發展高增值產業，可惜講來講去得個吉，連成立創新及科技局嘅計劃都受到立法會阻撓而寸步難行，試問咁又點樣吸引人才吖？冇計喇，此地不留人，自有留人處，今時今日香港唔止吸引唔到外來人才，連本地人才都留唔住，講起真係可悲。

人才係最寶貴資源，世界各地都想方設法吸引各類人才。新加坡過去十年吸納咗過百萬名新移民，當中大部分係教育程度較高嘅專業人士，令新加坡嘅競爭力同經濟增長如虎添翼，香港真係相形見絀囉。

係人都知，香港獨沽金融一味，唔係炒樓，就係炒股，搞到經濟結構愈來愈單調，競爭力每況愈下，尤其科技產業更加不堪提，唔止喺亞洲四小龍中叨陪末席，而且遠遠落後於上海、深圳等內地城市，簡直丟架。廿一世紀係科技時代，香港科技大落後，既睇唔到出路，更睇唔到前途，留得住人才至奇喇。

話時話，除咗去台灣讀書嘅港生樂不思歸，前幾年內地尖子來港升學嘅熱潮亦已成為明日黃花，好多人不惜放棄本港嘅獎學金，寧願留喺內地升學，或者去歐美留學，香港吸引力不斷消失，再咁落去，金融中心遲早變番小漁村都似，叮！