嚴防毒菜入口 最怕把關甩漏

即係咁，港府對食物安全把關不嚴，一直備受詬病，今個月起終於實施《食物內除害劑殘餘規例》，收緊食物內殘餘農藥嘅規管，雖然姍姍來遲，但總算係遲來嘅補鑊。

唔講唔知，呢隻鑊其實好大o架。呢嗱，內地最近嘅測試中，好多蔬菜殘餘農藥都超標，其中菠菜、芥菜、青豆角同白豆角更加屬於農藥含量高危品種，令人聞之色變。事實證明，港府早就應該加強把關喇。

係人都知，檢驗標準愈嚴，安全系數愈高。據業內人士講，新例實施前，內地入口蔬菜只須檢驗十四種農藥含量，家陣就增加到約八十種，多咗幾倍，檢驗出事機會自然大增喇。亦即係話，以前嘅測試標準太過寬鬆，港人矇查查，都唔知食咗幾多問題蔬菜落肚。

正所謂，民以食為天，食以安為先。加強規管殘餘農藥新例實施之後，蔬菜價格無可避免會因為檢驗成本等因素而上漲，但無論點都好，食貴菜總好過食毒菜。禍從口入，後患無窮，唔係講笑o架。

須知近年內地問題食品愈爆愈多，只有更可怕，沒有最可怕，偏偏本港食品絕大部分來自內地，而港府又求求其其，監管不嚴，把關不力，食安防線形同虛設，問題食品長驅直入，市民根本避無可避。

唔係冤枉港府o架，近年每逢內地出現食品安全問題，本港幾乎無可避免遭受池魚之殃，無論係蘇丹紅禽蛋、孔雀石綠魚、三聚氰胺奶製品，定係農藥超標蔬菜，當局嘅反應次次都係慢幾拍，而且次次都係賊過興兵，根本解決唔到問題。

好似前排嘅麥當勞「過期肉」風波咁，內地人心惶惶，連日本都宣告淪陷，而港府仲無動於衷，懶得就懶，疏於防範，甚至聲稱香港冇發現問題肉類添，結果要靠香港麥當勞「自首」，食物安全中心至確認有過期肉流入本港，你話係咪反應遲鈍吖？如果旨意呢班官僚為食物安全把關，隨時死得人多。

始終都係呢句，食物安全無小事，市民健康大過天，監管寧緊勿鬆。當局家陣話就話推出新例限制蔬菜殘餘農藥，最怕港產官僚渾渾噩噩，得過且過，有法例等於冇法例，結果又係嘥氣嘅咋。咪話太一叮唔提醒，家陣香港已經七國咁亂，如果再爆發類似過期肉嘅醜聞，你哋一定會被問責o架，叮！