政壇：八大校長都驚黃之鋒？
喺前日中學文憑試部分科目覆核結果出嚟之後，學民思潮召集人黃之鋒就喺社交網站公開成績，話五科成績合共有十九分，已經畀香港公開大學（OU）政治及公共行政學系收咗。相信呢個消息會令本港八大院校校長鬆一口氣，事關傳聞上月八大院校校長有個聚餐，言談間提起高調嘅黃之鋒，原來個個都話怕咗佢，有校長仲講笑話，寧願捱義氣出獎學金送佢去第二間讀咁話。
設計圖片
據聞上月八大院校嘅校長聚餐，教育局局長吳克儉都有出嚟。大家傾偈時就提起黃之鋒呢個喺政圈冒起嘅後生仔。由於黃之鋒今年升大學，嗰時文憑試又未放榜，所以大家對佢會入讀邊間大學都仲估估吓。但黃之鋒似乎就唔多受校長們歡迎，大家都話佢咁高調，依家又正值政改多事之秋，驚佢搞事多過讀書。
據聞有校長仲笑笑口話，如果唔好彩畀黃之鋒入咗自己間大學，真係寧願出獎學金畀第二間大學收佢，當貼錢送走瘟神咁話。班校長都覺得係條好橋，但始終都冇人肯做收黃之鋒嗰個，即係有獎學金補貼都唔制。不過，隨住黃之鋒入讀公開大學，唔知八大校長係咪可以鬆一口氣呢？如果當初黃之鋒夠晒分入八大院校，咁佢哋又點拆招呢？
傳言論撩OU校友
黃之鋒本身就係惹火人物，除咗校長們耍手擰頭外，原來各大學嘅學生都唔多歡迎佢。黃之鋒日前話，唔想啲人講咩「黃之鋒搞政治讀唔掂書最後咪要入OU」。有傳佢嘅言論挑起班OU學生嘅神經，該校有校友會考慮緊發聯署聲明，對佢標籤同貶低OU表示遺憾喎。
