泳池頻唱空城計 康署管理真濕滯

件事係咁嘅，元朗游泳池前日下午突然貼出通告，話因為救生員當值人數不足，須暫時關閉喎，搞到唔少泳客摸門釘，失望而回，怨聲載道。咁就奇喇，泳池朝早仲如常開放，點解下午突然拉閘？康文署解釋話，原來安排泳池第二同第三節有十三名救生員當值，點知中午過後佢哋陸續請「病假」，無人當值咯喎，咪惟有關閉囉。據拯溺員工會負責人講，前排聽聞有救生員曾投訴人手不足問題，集體請假可能同呢個訴求有關。

救生員個個年輕力壯，平時精神奕奕，十幾個人同時請病假，唔使問阿貴，實係心病居多嘅喇。其實，救生員嘅「病因」好簡單，就係長期人手不足，壓力爆煲。拯溺員工會曾經多次指出，公眾泳池救生員人手未達國際標準，點知康文署借咗聾耳陳隻耳，一直拒絕增聘人手，搞到不時有公眾泳池因為救生員不足而被迫關閉。

呢嗱，四月底之嘛，維園游泳池八名救生員集體告病假，搞「野貓式」罷工，泳池臨時關閉四粒鐘。上個月，粉嶺游泳池嘅訓練池同嬉水池，以及深水埗嬉水池及跳水池亦因為人手不足，早上時段要關閉，泳客無所適從，媽聲四起。

根據國際標準，一個泳池起碼要有四個以上救生員當值，本港公眾泳池即使人齊開工，每個池亦只得兩個人睇檔，旺季泳池人山人海，萬一睇漏眼好大鑊o架。最離譜嘅係，人手不足幾乎年年如是，亦幾乎年年有救生員集體請病假抗議，而康文署就年年都關人個關，市民只能夠年年做磨心。所以話，泳客「望池興嘆」，康文署難辭其咎。

即係咁，救生員為爭取自身利益而採取工業行動，係無可厚非嘅，之但係，次次都失驚無神玩「野貓式」罷工，等於攞市民利益做籌碼，咁就值得商榷喇，救生員咁做未必可以達到目的，反而可能令市民討厭，隨時得不償失。

就好似部分立法會議員咁吖，不務正業，郁吓就拉布，郁吓就流會，搞到神憎鬼厭，堂堂立法會畀人叫「垃圾會」，呢啲咪咎由自取囉。

泳池頻唱空城計，康署管理真濕滯。無論點都好，泳客安全大過天，救生員人手絕對唔慳得，康文署官僚唔該快啲諗計同救生員坐低傾掂佢，夏日流流長，如果大吉利是因為人手短缺而搞出人命，呢隻鑊你班官僚一定孭硬o架，叮！