通街都係無牌樓 皆因官僚懶執法

嗱，法例白紙黑字寫得好清楚，大廈及地舖必須展示正確嘅門牌號數，弊在好多人有法不依，慳得就慳，令法例形同虛設。本報多次揭發大廈及地舖門牌錯亂，甚至有唔少「無牌」大廈，令市民無所適從，遊客更加係一頭霧水，弊在負責執法嘅差餉物業估價署一直闊佬懶理，關人個關，導致問題不斷惡化，連申訴專員公署亦忍無可忍，決定主動介入調查。

申訴專員公署係咁講嘅，該署○九年至今收到七宗涉及門牌出錯嘅投訴，包括差估署編配門牌時擺烏龍，門牌號數同其他政府部門嘅通信門牌唔統一。最不可思議嘅係，差估署前幾年巡查發現依法展示門牌嘅業主有九成半，但舊年嘅巡查顯示能夠正確展示門牌號數嘅比例居然跌至八成四，守法嘅業主愈來愈少，你話當局究竟點樣監管o架？

差估署係威係勢做咗場巡查騷，結果虎頭蛇尾，問題冇改善不特止，反而更加惡化，唔使問阿貴，都知道係署方有法不執、執法不嚴所造成。

呢嗱，差估署話就話定期發信，提醒業主正確展示門牌，又話會加強巡查喎，其實得個樣嘅咋。署方由○七年到依家，先後向超過六千位業主發出勸喻信，以及四十七份標示令，但咁多年來檢控數字居然係零，擺明係無牙老虎喇。

即係話，有法例等於冇法例，業主無論展示錯誤門牌號碼，或者索性唔展示門牌，或者將門牌亂咁放，當局都隻眼開隻眼閉，久而久之，大家咪當法例冇到囉。呢嗱，連東亞銀行呢啲大企業都被踢爆違規，問你服未。正如法律界人士話齋，差估署發警告信之後就關人個關，冇積極跟進，更冇檢控違法業主，咪形成惡性循環囉。

講開又講，差估署做嘢求求其其，烏龍百出，早就有前科嘅喇。幾年前有離島村民申請門牌，獲編配號碼竟然同鄰居一模一樣，而署方事後仲死撐唔認錯，直至本報介入後至肯認衰，重新為村民編配門牌號碼。正所謂，見微知著，差估署咁小嘅事都甩甩漏漏，旨意佢哋做大事，簡直係緣木求魚。

話時話，門牌錯亂唔止對市民構成不便，而且隨時影響部門執法甚至阻礙救援，後果可大可小o架。無論點都好喇，今次申訴專員公署主動介入調查，希望能夠撥亂反正，否則，香港遲早變成「無牌」城市咋，叮！