新民黨近年不斷擴闊政治版圖,除喺新界西密密吸納區議員做樁腳外,年頭仲同喺沙田嘅公民力量結盟,令該黨一下子擁有三十名區議員,穩握參選立法會超級議席嘅入場券(超級議席須獲十五名民選區議員提名)。據聞黨內有唔少人包括主席葉劉淑儀在內,都想勸副主席「田二少」田北辰嘗試出選超級議席,目前只欠田二少本人首肯。

設計圖片

綜合多名黨內人士分析,田二少出戰超級議席有幾個好處。首先該黨目前只喺港島區同新界東、西擁有區議會議席,但九龍東、西仲未能開拓,若佢出選超級,有助該黨測試水溫,因為屆時佢喺九龍區嘅得票,可以話係該黨嘅基本票源,藉此推算出該黨喺九龍區有幾大支持度,方便評估日後係咪派人出選。

如獲高票利葉劉選特首

其二係由於建制派票源盡歸建仔、工聯會所有,預料田二少出戰超級選舉時所得嘅全港票數,將係新民黨重要數據。如果全港五區得票較其餘建制派候選人高,絕對令新民黨聲價十倍,有助葉劉喺一七年爭取入閘選特首時有更多籌碼在手。

最後一個好處係假如田二少成功奪得超級議席,佢個立會新界西空缺亦可騰空畀黨內第二梯隊,若能搶多一個議席,亦令黨內第二梯隊順利接班,到時田二少就有資格接掌成個黨,正式做一哥。

呢條數計落有辣有唔辣,但風險都幾高,一旦失敗隨時引起連鎖效應,所以依家田二少唔敢輕舉妄動,暫時先以連任區議員做目標,等明年區選結果明朗化之後再作盤算。

第一手消息請下載on.cc東網iPhone/iPad/Android/Windows Phone Apps