開講有話,好嘅唔靈醜嘅靈。甲午年係惹火之年,玄學家一早警告易有水災、火災、爆炸甚至爆發戰爭,唔係靠嚇o架,就呢一個月之嘛,國際空難一單接一單,兩岸又相繼發生大爆炸,鑊鑊新鮮鑊鑊甘。香港雖然一向被視為福地,但家陣係地球村時代,有時你唔招災惹禍,災禍都會自己搵上門,都係小心啲好!

冇錯嘞,太一叮講緊嘅之唔係來勢洶洶嘅伊波拉病毒囉。截至目前為止,疫情已經喺西非畿內亞、塞拉利昂及利比里亞奪去超過七百條人命,世衞組織警告疫情瀕臨失控,隨時擴散到其他國家,認真唔講得笑。

疫情警鐘大響,政府正常反應梗係加強防疫,嚴防死守o架啦,不過港產官老爺好特別,唔係如臨大敵,反而滋油淡定,懶懶閒閒。食衞官僚一個接住一個大派定心丸,話乜嘢伊波拉病毒傳播力較低,相信本港嘅風險相對較低喎。而入境處就更加老僧入定,淨係向揸西非疫區三國護照嘅入境者派發健康單張,以及喺尖沙咀重慶大廈等非洲旅客聚集嘅地區宣傳了事。

喂,派吓單張就當防疫,有冇再兒戲啲呀。唔怕一萬,最怕萬一,低風險唔代表零風險,特別係伊波拉病毒死亡率高達九成,比沙士更犀利吖。好似美國咁吖,首都華盛頓今個星期舉行美非峰會,雖然非洲與會者貴為官方代表,但美國政府一樣冇面畀,一樣要求佢哋入境前先接受體檢。至於一海之隔嘅澳門更加大陣仗,宣布對西非入境人士進行健康評估,兼且每日透過電話追蹤佢哋嘅健康狀況。

係囉,既然澳門做得到,香港有咩理由做唔到吖?有數得計,今年頭五個月從疫區入境嘅旅客大約四千人,即係平均每日只需要處理三十人左右,人手斷估唔成問題。再講吖,目前有超過六千名酷刑聲請者滯留本港,當中唔少嚟自西非地區,當局起碼都應該要求佢哋提交健康證明或者接受檢疫啦,吓話。

提起防疫,太一叮不期然諗起一段傷心往事。當年沙士襲港,當局起初掉以輕心,繼而方寸大亂,結果造成近三百人死亡,幸存者亦飽受後遺症折磨;反觀澳門係亞洲少數零死亡及零感染嘅地區,令人刮目相看,唔怪得近年好多港人話要移民澳門。思則有備,有備無患,呢啲咪有準備同冇準備嘅分野囉。

諗諗吓,伊波拉病毒固然恐怖,但點都唔及瞌眼瞓,任由疫症長驅直入嘅港產官僚咁恐怖。最慘係「官僚病毒」同伊波拉一樣,都係冇疫苗,都係無藥可醫,都咪話唔得人驚呀,叮!

第一手消息請下載on.cc東網iPhone/iPad/Android/Windows Phone Apps