東方報業集團踢爆香港郵政連串管理混亂及大花筒醜聞，審計署去年跟進揭發經營不善、監督不力等十宗罪，立法會政府帳目委員會日前亦發表報告炮轟。郵政官僚衰完一鑊又一鑊，依然不知悔改，究竟知唔知個醜字點寫o架？
最新出爐嘅帳委會報告踢爆諸多施政亂象，其中香港郵政更加淪為箭靶中嘅箭靶。冇誇張o架，報告羅列香港郵政管理不善嘅種種「罪證」，對郵政基金二十年來有八年虧損、十四年達唔到固定資產目標回報率，以及近八成郵局勁蝕而「血流不止」表示遺憾；又對郵政署署長未有盡力與各部門探討如何提高靈活性表示不滿和失望，促請當局從根本檢討香港郵政嘅運作情況。立法會炮聲隆隆，社會對香港郵政有幾大怨氣，畫公仔唔使畫出腸咯。
點解香港郵政虧損得咁勁？原因之一是工作超時補水問題嚴重。單係一四至一五年度咋，就達到一百三十六萬多個小時，其中近八成共獲一億七千九百萬元超時津貼補償，約四千二百名收取補水嘅員工中，獲發津貼相當於薪酬嘅百分之十五。香港郵政一方面收縮業務，減少服務，一方面狂開OT補水，如果話當中冇蠱惑，根本冇人信，本報就曾踢爆郵政員工集體蛇王呃補水。郵政官僚當納稅人係提款機，洗腳唔抹腳，唔虧損至奇喇。
除咗經營不善，郵政管理混亂同樣備受詬病。包括自○八年以來，一直未有就處理及派遞各類郵件嘅標準時間作全面檢討，定期進行嘅派遞時段調整亦有延誤，被批評未有盡監督職責等等。總之，成個香港郵政烏煙瘴氣，衰嘢數到天光都數唔晒，難怪先後六次被審計署點名狠批，仲被譏為「審計署長寵兒」喇。
即係咁，香港郵政爛到入心，點止係審計署長寵兒，仲係立法會帳委會寵兒添。大家有眼睇，港產官僚面皮好似電話簿咁厚，審計署炮轟又好，帳委會遺憾又好，次次都係敷衍了事，意見接受，態度照舊，問題唔止冇改善，反而愈來愈惡劣添。當局聲稱會喺每五年一次檢討中向財政司司長及相關部門反映問題，作出改善，搵鬼信咩。
計太一叮話齋，香港郵政醜聞不絕，死性不改，何止令人遺憾，直頭令人憤怒喇。港府弱勢無能，本來已經施政不順，民怨載道，加上香港郵政呢個大包袱，想唔繼續民望尋底都唔得喇，叮！
第一手消息請下載on.cc東網
