古人話︰過而不改，是謂過；無恥之恥，無恥矣。政府部門烏龍百出，亂象叢生，市民早就見怪不怪，但好似食環署咁錯而不改，教而不善，就真係少見咯。

呢，申訴專員公署公布去年工作簡報，食環署例牌又係重點批評對象。其中一宗投訴係咁嘅，有市民投訴食肆嘅白灼蝦出現類似蠕蟲物體，點知食環署經過化驗後，聲稱多名專家都未能確定涉及邊種生物，唔排除源自蝦本身，又話冇足夠證據提出檢控，就咁不了了之。其實正如申訴專員質疑，食環署嘅所謂專家只係防治蟲鼠組、漁護署以及負責評估食物安全嘅政府化驗所，專上學院有咁多專家，點解食環署唔搵佢哋求證呢？

咁都未算吖，有市民購買兩斤懷疑沾有殘餘農藥嘅油麥菜，化驗結果顯示除害劑超標十三倍，點知食環署居然以風險評估報告未達舉證要求為由，淨係向食物銷售商發警告信就算數，而且警告信內容空洞無物，毫無阻嚇力可言。申訴專員批評食環署過於草率和馬虎，未有盡責守護公眾食物安全，真係一啲都冇講錯。

所以話，食環署官僚出名懶到出汁，得過且過，旨意佢哋為市民把關，蚊都瞓蛇都死喇。曾經有讀者向本報投訴，話喺餐廳食日式放題，懷疑食咗冒充劍魚嘅油魚，記者將有關樣本交畀食環署化驗，點知對方一味耍手擰頭，一腳將個波踢畀海關。係人都知，油魚唔單止係廉價魚，仲分分鐘食壞人，日本早就將油魚列為「有毒魚」禁售，食環署放任自流，簡直靠害。

除咗對食物安全把關不力，食環署街市管理不善，更一直為人詬病。公共街市唔係十室九空，浪費土地資源，就係被濫用作貨倉甚至車位，搞到烏煙瘴氣，審計署及申訴專員公署曾多次介入調查，提出唔少改善建議，可惜講者自講，食環署意見接受，態度照舊，結果問題冇解決不特止，而且不斷惡化，年年虧損過億元，問你怕未。

事實證明，食環署成為政府部門「投訴王」，絕對唔係浪得虛名。淨係本報投訴版收到嘅個案，舊年就超過三千宗，平均每日接近十宗，都咪話唔誇張。當然喇，港府施政混亂，點止食環署烏龍百出，其他部門亦唔好得幾多，港府官僚陋習一日唔改，無論申訴專員公署及審計署點樣調查，都係嘥氣嘅咋，叮！