香港大學作為本港龍頭大學,近年國際排名跌跌不休,無復當年之勇,唯獨有樣嘢傲視同儕,認咗第二,冇人敢認第一。係乜嘢?咪就係校園政治化囉。

嗱,港大新任校委會主席李國章日前首次主持會議,結果又演變成暴力圍堵及禁錮事件,近二百名學生及校外示威者以校委會拖延成立專責小組檢討大學條例為由,多次衝擊會議大樓,並佔領大樓正門及所有人、車出入口。喺混亂之中,學生與在場警員多次爆發衝突,有校委會成員及女職員因被包圍而感到不適送院,李國章更加被困到凌晨至由警員護送離開,問你怕未。

一之為甚,豈可再乎?早前因為副校長任命風波,已經發生過一次暴力衝擊及禁錮校委會醜聞,估唔到咁快又嚟一次,唔通嫌港大未夠亂?大學係讀書嘅地方,學生理應文明理性,家陣居然淪為政治鬥獸場,搞到烏煙瘴氣,國際排名唔插水至奇。呢,日前《金融時報》公布全球百大工商管理碩士課程排行榜,港大急挫十六位至四十四名,你話係咪可悲吖?睇怕經過今次衝擊事件,排名隨時再跌都似。

即係咁,學生有表達意見嘅自由,莫講罷課、集會、示威,就算絕食都冇人阻止,但一定要守法律、守規矩,唔可以想點就點。書本都有教喇,以力服人者霸,以德服人者仁。學生淪為紅衞兵,郁啲就衝擊,郁啲就圍堵,郁啲就禁錮,咁同暴徒有乜分別呢?當然,唔係個個學生都甘心淪為政治棋子,參與搞事嘅嚟嚟去去都係嗰一小撮人,弊在一粒老鼠屎足以搞壞一鍋粥,港大被呢班紅衞兵搞到永無寧日,講起都幾無奈,唔怪得連洋校長都忍無可忍喇。

最令人反感嘅係,有啲學生頭頭目空一切,連基本嘅誠信及人格都冇。好似現任港大學生會會長嘅馮敬恩咁,一方面喺校委會投票支持成立專責小組,一方面被指暗中通風報信煽動學生衝擊校委會,呢種行徑連蠱惑仔都不齒喇。有人就講得啱嘞,僱主千祈要帶眼識人,唔好僱用呢啲出爾反爾、毫無誠信嘅二五仔,以免引狼入室吖!

一句講晒,香港大學淪戰場,風雨不斷有排亂。計太一叮話齋,反正港大被政治入侵,睇怕都幾難撥亂反正,不如索性開番個政治鬥爭碩士課程,話唔定可以喺全球排名獨佔鰲頭o架,叮!